د روسیې لوړپوړی پلاوی د اړیکو او اقتصادي همکاریو لپاره کابل ته راځي

د افغانستان د بهرنیو چارو وزارت وايي، د روسیې یو لوړپوړی پلاوی به د پنجشنبې په ورځ کابل ته سفر وکړي. د وزارت په وینا، د پلاوي مشري د روسیې د لومړي وزیر مرستیال الکسي اوورچوک کوي.

د بهرنیو چارو وزارت په خپره کړې خبرپاڼه کې ویلي، روسی پلاوی به له افغان چارواکو سره د دواړو هېوادونو پر دوه اړخیزو اړیکو خبرې وکړي. په دې لیدنو کې به اقتصادي او سوداګریزې همکارۍ هم د بحث له مهمو موضوعاتو څخه وي.

د وزارت د معلوماتو له مخې، د سفر بله موخه د افغانستان او روسیې ترمنځ د اړوندو اړیکو د پراختیا لپاره د لارو چارو ارزول دي. خو د پلاوي د سفر د بشپړې اجنډا او له افغان چارواکو سره د ټاکل شویو لیدنو په اړه تر اوسه نور رسمي جزئیات نه دي خپاره شوي.

دا سفر په داسې مهال ترسره کېږي چې د کابل او مسکو ترمنځ سیاسي، اقتصادي او سوداګریزې اړیکې پراخې شوې دي. د بهرنیو چارو وزارت د دې سفر د دقیقې نېټې لپاره د لړم یوویشتمه، چې له پنجشنبې ورځې سره برابره ده، یاده کړې ده.