د کابل ارزانه سړکغاړې خواړه؛ د بېوزلۍ او روغتیا ترمنځ ستونزمن انتخاب
په کابل ښار کې د سړکونو پر غاړو پلورل کېدونکي خواړه د کمعایده خلکو لپاره د غرمې ډوډۍ ارزانه او اسانه لاره ګرځېدلې، خو د دغو خوړو د پاکوالي او روغتیايي خوندیتوب په اړه اندېښنې هم زیاتې دي. اوسېدونکي وايي، د موټرو لوګي، دوړې او د حفظالصحې کمزوري شرایط کولای شي د خلکو روغتیا له خطر سره مخ کړي.
د کابل د شپاړسمې ناحیې اوسېدونکي حاجي زراب شاه وویل، د واټونو پر غاړو ایښودل شوي خواړه د ښار له دوړو او ګردونو سره مخامخ وي او ماشومان، مزدوران او نور خلک یې خوري. د هغه په وینا، که د خوړو د پلور پر مهال پاکوالي ته پام ونه شي، د ناروغیو د خپرېدو زمینه برابرېږي.
خو د احمدشاه بابا مېنې اوسېدونکی سرور خان، چې د ریکشې په چلولو د خپلې کورنۍ لګښتونه برابروي، وايي اقتصادي ستونزې هغه دې ته اړ باسي چې له همدې خوړو استفاده وکړي. هغه وویل، د ورځې له سهاره تر ماښامه شاوخوا دوه یا درې سوه افغانۍ ګټي او که په رستورانت کې ډوډۍ وخوري، د ورځې ډېره یا ټوله عاید به یې ولګېږي؛ له همدې امله د لسو یا شلو افغانیو ډوډۍ او شاوخوا دېرش افغانۍ سبزي اخلي.
د کابل د اوسېدونکو په وینا، په ځینو رستورانتونو کې د یوه خوراک بیه له ۲۰۰ تر ۳۰۰ افغانیو رسېږي، خو د سړکونو له کراچیو څخه خلک د ۲۰ تر ۴۰ افغانیو په بدل کې خواړه ترلاسه کولای شي. پیرکي، وریجې، لوبیا، ځیګر، د چرګ کباب، آش، سوپ او بېلابېل سبزیجات هغه خوراکونه دي چې په بازارونو او واټونو کې پلورل کېږي. د دغو خوړو ډېری پېرودونکي ورځني مزدوران، ریکشهچلوونکي او د بار وړلو په څېر کوچنیو کارونو بوخت کسان دي.
د خوړو یو پلورونکی ولي الله وايي، هڅه کوي خواړه پاک او مناسب وساتي. هغه له پېرودونکو وغوښتل چې د خوړو لپاره داسې ځایونه غوره کړي چې چاپېریال یې پاک وي. روغتیايي متخصصان بیا ټینګار کوي چې د پخلي او ساتنې ځای، د څښاک او مینځلو اوبو پاکوالی، د لوښو نظافت او د خوړو مناسبه تودوخه د خوړو د خوندیتوب اساسي شرطونه دي.
د داخله ناروغیو متخصص ډاکتر شبیر احمد نوري خبرداری ورکوي چې په ناپاکو اوبو تیار یا مینځل شوي خواړه، او هغه خوراکونه چې په ناسمه تودوخه کې ساتل کېږي، د نس ناستې او نورو عفوني ناروغیو خطر زیاتوي. د روغتیا نړیوال سازمان هم د پاکوالي، د خامو او پخو خوړو د بېلولو، بشپړ پخولو، مناسبه تودوخې او پاکو اوبو پر کارولو ټینګار کوي.
د کابل ښاروالۍ ویاند نعمت الله بارکزي د سړکغاړې خوړو د څارنې په اړه د پوښتنو ځواب ورنه کړ. نوموړي تر دې وړاندې ویلي وو چې د ښاروالۍ د چاپېریالي روغتیا ریاست خوراکي پلورونکو ته د شخصي پاکوالي، د چاپېریال حفظالصحې او د خوړو د ککړتیا د مخنیوي په اړه پوهاوی ورکوي. د اقتصادي ستونزو او بېوزلۍ په دوام سره، د کابل د ډېرو کمعایده خلکو لپاره ارزانه سړکغاړې خواړه لا هم د اړتیا وړ انتخاب پاتې دي.