یوناما: د افغانستان او پاکستان د لارې بندښت د ننګرهار پر اقتصاد او خلکو دروند اغېز کړی
د ملګرو ملتونو د سرمنشي د ځانګړې استازې او په افغانستان کې د یوناما مشرې رباب فاطمې ویلي، د افغانستان او پاکستان ترمنځ د کرښې تړل کېدو سوداګري ګډه وډه کړې او د دواړو هېوادونو د لارې پر خلکو یې جدي اغېز کړی دی. نوموړې دا څرګندونې ننګرهار ولایت ته د سفر پر مهال کړې دي.
فاطمې د سیمې وضعیت کړکېچن بللی او ویلي یې دي چې بېړنۍ پاملرنې ته اړتیا لري. د هغې په وینا، د سوداګرۍ له ګډوډېدو سره کاروبارونه کمزوري شوي، بېکاري په چټکۍ لوړه شوې او بېوزلي هم زیاته شوې ده. نوموړې ټینګار کړی چې د دې حالت د بدلون لپاره باید عملي حللارې پیدا شي.
د یوناما مشرې ننګرهار یوه له اقتصادي او ټولنیزو پلوه بډایه سیمه بللې او ویلي یې دي چې داسې اقدامات باید وشي چې د خلکو اقتصادي او ټولنیز فعالیتونه بېرته عادي مسیر ته ستانه شي. د هغې څرګندونې داسې مهال دي چې د سرچینې د معلوماتو له مخې، د دواړو هېوادونو ترمنځ د سیاسي ستونزو له امله نږدې یو کال کېږي سوداګري له خنډ سره مخ ده.
د افغانستان د سوداګرۍ او صنایعو خونې مشر محمد یونس مومند تر دې مخکې امریکا غږ ته ویلي وو چې اوس مهال د افغانستان او پاکستان ترمنځ هېڅ ډول سوداګري نه ترسره کېږي. د لارې د تړل کېدو دوام د سوداګرو او هغو خلکو لپاره ستونزې زیاتې کړې چې د پولې له دواړو غاړو سره یې اقتصادي اړیکې لرلې.
رباب فاطمې د ننګرهار د سفر پر مهال تورخم ته هم تللې او د راستنېدونکو افغانانو وضعیت یې له نږدې لیدلی دی. هغې ویلي، راستنېدونکي یوازې د لنډمهالې سرپناه، خوړو او بېړني خوندیتوب اړتیا نه لري، بلکې د هغوی لپاره باید د اوږدمهاله ملاتړ او حللارو په اړه هم پلان جوړ شي.
د افغانستان د بېړني سرحدي غبرګون د وروستیو معلوماتو له مخې، د ۲۰۲۵ کال له جنورۍ څخه د ۲۰۲۶ کال د اکتوبر تر ۲۴مې پورې له ۴،۲ میلیونو ډېر افغانان هېواد ته ستانه شوي دي. د راستنېدونکو دغه پراخ بهیر د بشري مرستو او د بیا ادغام له خدمتونو سره د اړتیاوو کچه لوړه کړې ده.