طالبان: د افغانستان له خاورې د پاکستان پر ضد د بریدونو ادعا نه منو
د طالبانو حکومت د امریکا د بهرنیو چارو وزیر مارکو روبیو هغو څرګندونو ته غبرګون ښودلی چې په کې یې د افغانستان له خاورې پاکستان ته د ترهګرۍ د ګواښ په اړه د اسلاماباد اندېښنې تایید کړې وې. د طالبانو ویاند ذبیح الله مجاهد وايي، د روبیو معلومات یو اړخیز دي او تر ډېره د پاکستان له لوري ورکړل شويو معلوماتو ولاړ دي.
مجاهد د طلوع نیوز سره په خبرو کې یو ځل بیا رد کړه چې ګواکې د افغانستان خاوره د پاکستان یا کوم بل هېواد پر ضد کارول کېږي. هغه وویل، د طالبانو حکومت د افغانستان او پاکستان ترمنځ د نښتو پیل کوونکی پاکستان بولي او ادعا یې وکړه چې اسلاماباد د ناامنۍ په رامنځته کولو کې هڅې کړې دي.
د طالبانو ویاند زیاته کړه چې کابل د امریکا په ګډون د هر هغه هېواد منځګړیتوب ته په ښه نظر ګوري چې د دواړو هېوادونو ترمنځ د خبرو زمینه برابروي. د نوموړي په وینا، مذاکرات د ستونزې د حل مناسبه لار ده او د منځګړو هېوادونو هڅې د ارزښت وړ دي.
مارکو روبیو مخکې په اټلانټا کې د شلو صنعتي هېوادونو د غونډې په څنډه کې ویلي وو چې واشنګټن د هغو بریدونو په اړه د پاکستان اندېښنې اورېدلې چې اسلاماباد یې له افغانستان سره تړاو ورکوي. نوموړي وویل، پاکستان باور لري چې د طالبانو حکومت د دغو بریدونو د مخنیوي لپاره کافي اقدامات نه دي کړي.
روبیو وویل، امریکا نه غواړي پاکستان د ترهګرۍ ښکار شي او که وکولای شي، په دې موضوع کې اغېزناک رول لوبولو ته چمتو ده. هغه په عین حال کې ټینګار وکړ چې واشنګټن له طالبانو سره نږدې اړیکې نه لري او زیاته یې کړه چې د پاکستان یاد کړي بریدونه یې لیدلي دي.
د پاکستان د بهرنیو چارو وزارت هم د روبیو له څرګندونو وروسته وویل چې د امریکا په ګډون د دوستو هېوادونو د منځګړیتوب او خبرو د اسانتیا له هڅو هرکلی کوي. خو اسلاماباد ټینګار کړی چې هر ډول ماناداره خبرې باید د طالبانو له لوري د تحریک طالبان پاکستان، بلوڅ ازادۍ پوځ او نورو وسلهوالو ډلو پر وړاندې له عملي، دوامدارو او د تایید وړ اقداماتو سره ملې وي.
پاکستان ادعا کوي چې تحریک طالبان پاکستان له افغانستانه په پاکستان کې بریدونه تنظیموي او د طالبانو حکومت یې ملاتړ کوي؛ خو طالبان دا تورونه ردوي او د پاکستاني وسلهوالو فعالیتونه د اسلاماباد کورنۍ مسئله بولي. مجاهد وايي، له پاکستان سره د جوړجاړي د نه رامنځته کېدو یو مهم لامل دا دی چې د هغه په وینا، پاکستاني چارواکي پر خپلو ناکامو تګلارو ټینګار کوي او سولهییزې لارې ته چمتو نه دي.