عدلیې وزارت: په پنځو کلونو کې ۲۰ قوانین او ګڼ تقنیني سندونه خپاره شوي
د عدلیې وزارت وايي، د اسلامي امارت له بیا واکمنېدو وروسته په تېرو پنځو کلونو کې ۲۰ قوانین او لسګونه نور تقنیني سندونه د رسمي جریدې له لارې خپاره شوي دي.
د حکومت د رسنیو مرکز اړوند د پرمختګ اوبپاڼې د خپرو شوو معلوماتو له مخې، دغه اسناد د رسمي جریدې په ۳۱ ګڼو کې چاپ شوي او د تقنیني سندونو د تدوین، چاپ او خپرولو بهیر په همدې موده کې روان ساتل شوی دی.
په خپرو شویو سندونو کې ۲۰ قوانین، ۷۷ فرمانونه، ۳۰ حکمونه، اته لارښوونې، شپږ کړنلارې، درې اصولنامې، دوه اساسنامې، یوه مقرره، یوه لایحه او یو نصاب شامل دي.
د عدلیې وزارت د معلوماتو له مخې، په دغو قوانینو کې د ځمکو د غصب د مخنیوي قانون، د شکایتونو د اورېدلو قانون، د امر بالمعروف او نهی عنالمنکر قانون، د صرافانو او پولي خدمتونو اړوند قانون او د خوراکي توکو او درملو د قاچاق د مخنیوي قانون هم شامل دي.
یاد وزارت څرګنده کړې چې د رسمي جریدې له لارې د دغو اسنادو خپرول د هېواد د تقنیني بهیر یوه برخه ده. په معلوماتو کې د یادو قوانینو او نورو سندونو د عملي کېدو په اړه نور جزئیات نه دي ورکړل شوي.