د نیویارک فډرالي محکمې د افغان بندیانو د لېږد پلان موقتاً وځنډاوه
د امریکا په نیویارک کې یوې فډرالي محکمې د ډونالډ ټرمپ د حکومت هغه پلان په موقت ډول درولی، چې له مخې یې په امریکا کې نیول شوي افغان وګړي پاکستان یا افغانستان ته لېږدول کېدل.
فډرالي قاضي والري کاپروني په خپل حکم کې امریکايي چارواکو ته لارښوونه کړې چې لږ تر لږه تر شنبې ورځې پورې د دغو افغانانو د انتقال بهیر ونهشي. دا پرېکړه وروسته له هغې وشوه چې د کډوالو د حقونو مدافع بنسټونو او د امریکا د کانګرس لسګونو غړو د یادو کسانو د احتمالي برخلیک په اړه جدي اندېښنې مطرح کړې.
د محکمې په اسنادو کې، چې اسوشیتیډ پرس ترلاسه کړي، راغلي چې د امریکا حکومت پلان درلود د لويیزیانا ایالت له توقیفخونو څخه یو شمېر افغانان د الوتکو له لارې پاکستان ته ولېږدوي. خو د محکمې له حکم مخکې حکومت ویلي وو چې د امریکا د کډوالۍ او ګمرکونو اداره لږ تر لږه د اوونۍ تر پایه پاکستان یا افغانستان ته د افغان وګړو د انتقال لپاره د چارټر یا سوداګریزو الوتنو پلان نهلري.
د امریکا د استازو جرګې او مشرانو جرګې له ۶۵ ډېرو غړو د بهرنیو چارو وزیر مارکو روبیو او د کورني امنیت وزیر مارکوین مولین ته په یوه لیک کې خبرداری ورکړی چې د زیانمنونکو افغانانو بېرته لېږل ښايي هغوی له شکنجې، څارنې، ځورونې او حتی د مرګ له ګواښ سره مخ کړي. د کډوالو د حقونو بنسټونو هم ویلي چې له ۸۰ ډېرو افغانانو، چې د احتمالي انتقال خبرتیاوې یې ترلاسه کړې، له دوی سره اړیکه نیولې ده.
د دغو کسانو په ډله کې ښځې، د پولیسو یو پخوانی افسر، د مذهبي لږکیو غړي او هغه افغانان شامل دي چې د کورنۍ ځینو غړو یې د امریکا له پوځ سره دنده ترسره کړې ده. مدافع بنسټونه خبرداری ورکوي چې افغانستان ته د ځینو کسانو ستنول ښايي د خپلسرو نیونو، اعدام، په عام محضر کې د دورو وهلو او غچاخیستونکو تاوتریخوالو خطرونه ورسره مل کړي.
د افغانستان د بهرنیو چارو وزارت د ویاند مرستیال ضیا احمد تکل هم پاکستان ته د افغان وګړو د احتمالي لېږد په اړه اندېښنه څرګنده کړې ده. هغه له امریکا غوښتي چې د دغو کسانو د برخلیک په اړه پرېکړه کې د هغوی مشروع حقونه او غوښتنې په پام کې ونیسي او ویلي یې دي چې درېیم هېوادونه باید د یوه هېواد د وګړو له حقونو پرته د هغوی د راتلونکي په اړه پرېکړه ونهکړي.
د افغان ایواک بنسټ مشر شان ونډایور د محکمې له پرېکړې هرکلی کړی، خو ویلي یې دي چې دا حکم یوازې یو لنډمهالی فرصت دی، نه د افغانانو د انتقال د مخنیوي د هڅو پای. نوموړي ټینګار کړی چې په امریکا کې د نیول شویو افغان وګړو د خوندیتوب لپاره به مبارزه روانه وي.