د افغانستان د ډیپلوماسۍ او اسلامي همکاریو په اړه علمي ناسته وشوه
د بهرنیو چارو وزارت د ډیپلوماسۍ په انستیتوت کې د ډیپلوماسۍ او د اسلامي همکاریو ټولنې د هڅو په اړه علمي ناسته جوړه شوه.
د اسلامي همکاریو ټولنې د دفتر عمومي رییس او سفیر، ډاکټر محمد بن سعید العیاش، په دې غونډه کې وینا وکړه. د بهرنیو چارو وزارت د کارکوونکو ترڅنګ د بېلابېلو وزارتونو او امارتي ادارو یو شمېر مسوولانو هم ګډون درلود.
العیاش د عامه او څو اړخیزې ډیپلوماسۍ پر ارزښت، مهمو وسایلو او کاري میکانېزمونو خبرې وکړې. نوموړي ګډونوالو ته د اسلامي همکاریو ټولنې د تاریخ، اداري جوړښت او تشکیلاتي څرنګوالي په اړه هم معلومات وړاندې کړل.
د غونډې په ترڅ کې د اسلامي همکاریو ټولنې په سرمشریزو او د بهرنیو چارو وزیرانو په غونډو کې د افغانستان په اړه د تصویب شویو پرېکړو موضوع هم مطرح شوه. د نوموړي په وینا، په کابل کې د دې ټولنې دفتر د دغو پرېکړو د پلي کېدو بهیر څاري.
د اسلامي همکاریو ټولنې د افغانستان د ملاتړ لپاره په بېلابېلو برخو کې خپلې هڅې او رول هم تشریح کړ. په دې برخه کې د ټولنې د اقداماتو او د افغانستان په اړه د هغې د دریځونو په اړه ګډونوالو ته معلومات ورکړل شول.
د ناستې په پای کې ګډونوالو خپلې پوښتنې او لیدلوري شریک کړل او پر مطرح شویو موضوعاتو یې هر اړخیز بحث وکړ.