په ترمذ کې د نشهيي توکو او خصوصي سکتور په اړه د دوحې پروسې غونډه
د دوحې پروسې په چوکاټ کې د نشهيي توکو پر وړاندې د مبارزې او د خصوصي سکتور د ملاتړ کاري ډلو دوه ورځنۍ غونډه د ازبکستان په ترمذ ښار کې پیل شوې ده.
د افغانستان د بهرنیو چارو وزارت په یوه خبرپاڼه کې ویلي، په دې ناسته کې د افغان پلاوي مشري د دغه وزارت د ملګرو ملتونو او نړیوالو کنفرانسونو رئیس، سید محیالدین سادات، کوي. د اسلامي امارت د اړوندو ادارو استازي هم د پلاوي په ترکیب کې شامل دي.
په غونډه کې د ملګرو ملتونو د مرستندوی پلاوي (یوناما)، اړوندو نړیوالو سازمانونو، د کوربه هېواد ازبکستان او د دوحې پروسې د نورو غړو هېوادونو استازي ګډون لري. د خصوصي سکتور استازي او یو شمېر متخصصین هم د بحثونو برخه دي.
د ناستې د اجنډا له مهمو موضوعاتو څخه د افغانستان د کرنیزو محصولاتو د معیارونو ټاکل، د محصولاتو تصدیق او نړیوالو بازارونو ته د صادراتو لپاره د چمتووالي لارې چارې یادې شوې دي. ګډونوال به د بدیل معیشت او ټولشموله اقتصادي ودې په اړه هم خبرې وکړي.
د بهرنیو چارو وزارت د معلوماتو له مخې، په غونډه کې به د خصوصي سکتور د پیاوړتیا، بازارونو ته د لاسرسي او د عملي همکاریو د رامنځته کولو پر لارو چارو د ګډونوالو نظرونه واورېدل شي.
ټاکل شوې چې د کاري ډلو دا ناسته دوه ورځې دوام وکړي او د افغانستان د اقتصادي فعالیتونو، کرنیزو محصولاتو د بازارموندنې او د نشهيي توکو پر وړاندې د مبارزې اړوند موضوعات د بحث په پایله کې تعقیب شي.