د افغانستان ښځې د چتم هاوس د ۲۰۲۳ کال جایزې ګټونکې شوې
د افغانستان ښځې د زړورتیا، ټینګښت او د جنسیت پر بنسټ د سیستماتیکې ځورونې پر وړاندې د مقاومت له امله د بریتانیا د شاهي نړیوالو اړیکو انسټیټیوټ، چې د چتم هاوس په نوم پېژندل کېږي، د سږني کال جایزه ترلاسه کړه.
د جایزې مراسم د دوشنبې په ماښام، د اکتوبر پر نهمه، په لندن کې ترسره شول. د افغانستان د ښځو په استازیتوب د فوټبال ملي لوبډلې پخوانۍ ګولساتونکې الهه صفدري جایزه واخیسته او د بریتانیا پخوانۍ لومړۍ وزیرې او د چتم هاوس پخوانۍ مشرې، ترزا مې، هغې ته وسپارله.
چتم هاوس ویلي، چې د طالبانو له بیا واکمنېدو وروسته افغان ښځې د زدهکړو، کار، په عامه ژوند کې د ګډون او د تګ راتګ په برخو کې له پراخو محدودیتونو سره مخ شوې دي. د دې بنسټ په وینا، ښځو سره له دې وضعیت څخه په بېلابېلو لارو د خپلو حقونو د دفاع هڅې روانې ساتلې دي.
د چتم هاوس اجرائیوي مشرې برونوین مدوکس ویلي، افغان ښځو د زدهکړو، کار او عامه ژوند څخه د دوی د ایستلو د هڅو پر وړاندې مقاومت کړی او د خپلو حقونو ترڅنګ یې د راتلونکو نسلونو د حقونو دفاع هم کړې ده. دغه بنسټ د ښځو مدني اعتراضونه، د پټو ښوونیزو شبکو جوړول او د بشري حقونو د سرغړونو ثبتول د دې مقاومت بېلګې بللې دي.
د مراسمو په ترڅ کې شهرزاد اکبر، زهرا جویا، ارزلا اشرف نعمت، بنفشه یعقوبي او فوزیه کوفي له بيبيسي خبریالې لیز دوست سره د افغان ښځو د وضعیت او د نړیوالې ټولنې د ملاتړ پر لارو چارو خبرې وکړې. تنظیموونکي وايي، افغان ښځو ته د جایزې ورکول د هغوی د ټولیز مقاومت د ستاینې او د دوی د وضعیت په اړه د نړیوال پام د ساتلو هڅه ده.
د چتم هاوس جایزه له ۲۰۰۵ کال راهیسې هغو اشخاصو، ډلو یا سازمانونو ته ورکول کېږي چې د نړیوالو اړیکو په ښهوالي او د نړیوالې همکارۍ په پراختیا کې یې اغېزناک رول لوبولی وي. ګټونکی د کارپوهانو له خوا تر نوماند کېدو وروسته د بنسټ د غړو د رایو له لارې ټاکل کېږي. په تېرو کلونو کې د اوکراین ولسمشر ولودیمیر زلنسکي، د بېپولې ډاکټرانو سازمان، د خبریالانو د ساتنې کمېټه او میلیندا ګېټس هم د دې جایزې ګټونکي پاتې شوي دي.