افغانستان د ځوانانو المپیک د فوټسال نیمه پایلوبې ته ورسېد
د افغانستان له ۱۸ کلونو کم عمره فوټسال ملي لوبډلې د ۲۰۲۶ کال د ځوانانو المپیک سیالیو په لړ کې کوربه سنګال ته شپږ ـ صفر ماتې ورکړه او د سیالیو نیمه پایلوبې ته یې لار پیدا کړه.
افغان لوبډلې د شنبې په ورځ، د نومبر په اوومه، د سنګال پر وړاندې په لوبه کې له پیله د سیالۍ کنټرول په لاس کې واخیست او په پای کې یې د شپږو ګولونو په توپیر بریا خپله کړه.
علي رضا احمدي په دې لوبه کې درې ګولونه ووهل او هاتریک یې ثبت کړ. ذاکر حسین عبدالهي، احمد اسماعیلي او حسین حسیني هم هر یوه یو ګول وواهه، چې له امله یې افغانستان د سنګال پر وړاندې پراخه بریا ترلاسه کړه.
افغانستان د سیالیو په الف ګروپ کې هم اغېزمنه لوبه کړې وه. دې لوبډلې لومړی پاناما ته پنځه ـ صفر او وروسته ارجنټاین ته دوه ـ یو ماتې ورکړې. له دې پایلو وروسته یې د بل پړاو د تېرېدو لپاره له سنګال سره مخامخ شوه.
د افغانستان د ۱۸ کلونو کم عمره لوبډله به اوس په نیمه پایلوبه کې له پرتګال سره ولوبېږي. د سیالیو د مهالوېش له مخې، نیمه پایلوبې د نومبر په نهمه او پایلوبه د همدې میاشتې په دولسمه نېټه ترسره کېږي.
د ۲۰۲۶ کال د ځوانانو المپیک سیالۍ د نومبر له لومړۍ تر ۱۲مې نېټې پورې د سنګال په ډاکار او دیامنیادیو ښارونو کې ترسره کېږي. په دغو لوبو کې د ۱۸ کلونو کم عمره ځوانانو او نجونو سیالۍ په دوو برخو کې تنظیم شوې دي.
دا د ځوانانو په المپیک کې د فوټسال دویم پړاو سیالۍ دي. د دې لوبو لومړی پړاو په ۲۰۱۸ کال کې د ارجنټاین په بوینس ایرس ښار کې ترسره شوی و. سنګال د لومړي افریقایي هېواد په توګه د ځوانانو د المپیک لوبو کوربتوب کوي.