په کابل کې د اسلامي همکاریو سازمان د افغانستان د ملاتړ هڅې تشریح شوې

په کابل کې د اسلامي همکاریو سازمان د دفتر مشر سفیر ډاکټر محمد بن سعید العیاش د افغانستان د ملاتړ لپاره د دغه سازمان د هڅو او د افغانستان په اړه د شویو پرېکړو د عملي کېدو د څارنې په تړاو معلومات وړاندې کړي دي.

د افغانستان د بهرنیو چارو وزارت په یوه خبرپاڼه کې ویلي، العیاش د دغه وزارت د ډیپلوماسۍ په انستیتوت کې «ډیپلوماسي او په افغانستان کې د اسلامي همکاریو سازمان هڅې» تر سرلیک لاندې وینا کړې ده.

په دې غونډه کې د بهرنیو چارو وزارت د کارکوونکو ترڅنګ د بېلابېلو وزارتونو او امارتي ادارو یو شمېر مسؤولینو هم ګډون کړی و. د ناستې موخه د اسلامي همکاریو سازمان د فعالیتونو او په افغانستان پورې اړوندو موضوعاتو په اړه د ګډونوالو خبرول بلل شوي دي.

د وزارت د معلوماتو له مخې، د اسلامي همکاریو سازمان د دفتر مشر په خپله وینا کې د عامه او څو اړخیزې ډیپلوماسۍ پر مهمو وسایلو او میکانېزمونو خبرې کړې دي. نوموړي همداراز د سازمان د جوړېدو تاریخ، بېلابېلې ادارې او تشکیلاتي جوړښت تشریح کړی دی.

العیاش د اسلامي سرمشریزو او د بهرنیو چارو وزیرانو په غونډو کې د افغانستان په اړه شویو پرېکړو ته هم اشاره کړې ده. د خبرپاڼې له مخې، نوموړي په کابل کې د اسلامي همکاریو سازمان د دفتر له لوري د دغو پرېکړو د عملي کېدو د تعقیب په اړه معلومات وړاندې کړي، خو د پرېکړو او د څارنې د څرنګوالي جزئیات یې نه دي خپاره شوي.

هغه په بېلابېلو برخو کې د افغانستان د ملاتړ لپاره د اسلامي همکاریو سازمان پر رول او هڅو هم خبرې کړې دي. د خبرپاڼې په متن کې د دې ملاتړ د برخو او مشخصو اقداماتو په اړه نور تفصیل نه دی ورکړل شوی.