د وان په سیمه کې د اتو افغان کډوالو د مړینې د پلټنې غوښتنه شوې
د ترکیې د وان ولایت په یوه سیمه کې، چې د ایران له پولې شاوخوا درې کیلومتره واټن لري، د اتو افغان کډوالو له مړینې وروسته د پېښې د علت معلومولو لپاره د پلټنو غوښتنه شوې ده. د دغو کسانو جسدونه د شنبې په ورځ موندل شوي دي.
د ځایي رسنیو د راپورونو له مخې، لومړنۍ څېړنې ښيي چې پر مړو د تاوتریخوالي څرګندې نښې نه لیدل کېږي. د مړو کسانو عمرونه د شاوخوا ۲۰ او ۲۵ کلونو ترمنځ اټکل شوي او احتمال ورکړل شوی چې هغوی د سختې یخنۍ له امله خپل ژوند له لاسه ورکړی وي.
د وان د وکیلانو ټولنې د دوشنبې په ورځ تایید کړې چې مړه شوي کسان افغان کډوال دي. دغې ټولنې ویلي چې د پېښې په اړه قضایي څېړنې روانې دي؛ خو تر دې دمه د مړینې وروستی علت په رسمي ډول نه دی اعلان شوی.
د ترکیې په پارلمان کې د وان ولایت د خلق دیموکراتیک ګوند استازي، ګلجان کاچماز سایییت، د کورنیو چارو وزیر ته په استولي لیک کې د پېښې د هر اړخیزې څېړنې غوښتنه کړې ده. هغه ویلي چې موضوع یې پارلمان ته هم رسولې او له وزارت څخه یې د مړو کسانو د تابعیت، د هغوی د مړینې د علت او د ترسره کېدونکو قانوني تحقیقاتو په اړه د معلوماتو غوښتنه کړې ده.
د پارلمان دغه غړي له کورنیو چارو وزارت څخه غوښتي چې له ۲۰۲۰ کال راهیسې په وان ولایت کې د کډوالو د بېرته ستنولو په مرکزونو کې د ساتل شویو کسانو شمېر روښانه کړي. هغه همداراز د هغو کډوالو د شمېر په اړه معلومات غوښتي چې په همدې موده کې له ایران څخه ترکیې ته داخل شوي او یا له ترکیې څخه ایستل شوي دي.
کاچماز سایییت له وزارت څخه په سرحدي سیمو کې د انسان قاچاق پر وړاندې د مبارزې او د کډوالو د حقونو د سرغړونو د مخنیوي په اړه د ترسره شویو اقداماتو بشپړ راپور هم غوښتلی دی. تر اوسه په ترکیه کې د افغانستان سفارت، چې د طالبانو حکومت استازي یې چارې پر مخ وړي، د دغې پېښې په اړه څرګندونه نه ده کړې.
په وروستیو کلونو کې ترکیه د هغو افغانانو لپاره د تګ یوه مهمه لاره ګرځېدلې چې غواړي اروپا ته ورسېږي. د سرچینې د معلوماتو له مخې، په دې مسیر کې د افغان کډوالو تګ راتګ په دې وروستیو کې زیات شوی دی.