د اللهداد فدايي د نیول کېدو او ویډیويي ادعاوو په اړه نوې څرګندونې
د طالبانو حکومت ته نږدې رسنیو د جمهوریت د مهال د یوه پوځي چارواکي، اللهداد فدايي، هغه ویډیو خپره کړې چې پکې نوموړی ادعا کوي له «افغانستان متحدې جبهې» سره په همغږۍ یې په لغمان او نورستان کې د طالبانو حکومت پر ضد د بریدونو پلان جوړاوه. د ویډیو د ثبت ځای او وخت په څرګند ډول نه دي معلوم.
په ویډیو کې فدايي وايي، د طالبانو حکومت له بیا واکمنېدو وروسته شاوخوا یو نیم کال په افغانستان کې پاتې شوی، وروسته ایران ته تللی او بیا د طالبانو حکومت د تماس له کمېسیون سره په همغږۍ بېرته افغانستان ته ستون شوی دی. هغه زیاتوي چې له څه مودې راهیسې یې له جنرال سمیع سادات سره اړیکه لرله او د لغمان او نورستان لپاره یې د مخالفو فعالیتونو د تنظیم په اړه خبرې کړې وې.
بيبيسي په خپلواک ډول نه شي تاییدولی چې فدايي دا مهال چېرته ساتل کېږي او ویډیويي څرګندونې یې په څه ډول ترلاسه شوې دي. د طالبانو حکومت هم تر اوسه په رسمي ډول د هغه د نیول کېدو پخلی نه دی کړی؛ خو د نوموړي د نیول کېدو راپورونه د اګست میاشتې په وروستیو کې خپاره شوي وو.
«افغانستان متحدې جبهې» په یوه اعلامیه کې فدايي خپل پیاوړی او باوري قومندان بللی او ویلي یې دي چې نوموړي د افغانستان د ازادۍ په مبارزه کې د ونډې اخیستو لپاره چمتووالی درلود. دې ډلې ادعا کړې چې فدايي تر اوسه د دوی په استازیتوب د طالبانو حکومت پر ضد په پوځي عملیاتو کې برخه نه ده اخیستې. د ډلې مشر سمیع سادات ویلي، د هغه د خوشې کېدو لپاره به له ټولو ممکنو لارو کار واخلي.
اللهداد فدايي د لغمان اوسېدونکی بلل کېږي او د جمهوریت پر مهال یې د میدان وردګو، بغلان، نیمروز او لغمان د امنیه قومندان په توګه دنده ترسره کړې ده. تر دې وړاندې د نوموړي او سمیع سادات ترمنځ د واټساپ له لارې د ادعا شویو غږیزو پیغامونو د خپرېدو راپورونه هم ورکړل شوي وو. په دغو پیغامونو کې ظاهراً په نورستان کې د تجهیزاتو او عملیاتو په اړه خبرې اورېدل کېږي، خو د پیغامونو کرهوالی او د تبادلې وخت نه دي تایید شوي. د متحدې جبهې نږدې سرچینو بیا دغه غږیز مواد جعلي بللي دي.
متحدې جبهې د ۲۰۲۳ کال په اکتوبر کې په امریکا کې خپل موجودیت اعلان کړی و او وايي چې د پخوانیو پوځي چارواکو، جنرالانو، والیانو او نورو افغانانو له خوا جوړه شوې ده. دې ډلې د افغانستان د اسلامي جمهوریت د اساسي قانون د بېرته پلي کېدو او د خلکو د ازادۍ او سولې لپاره د مبارزې ادعا کړې ده. سادات هم په وروستیو څرګندونو کې ویلي چې د ډلې غړو په تېرو میاشتو کې په بېلابېلو ولایتونو کې د طالبانو حکومت پر ضد بریدونه کړي، خو طالبانو دې ادعا ته لا غبرګون نه دی ښودلی.
د دې موضوع په تړاو د افغانستان د امنیتي وضعیت او له پاکستان سره د طالبانو حکومت د اړیکو بحثونه هم مطرح شوي دي. طالبانو مخکې ادعا کړې چې مخالفې ډلې په پاکستان کې تمویل او تجهیزېږي، خو اسلاماباد دا خبره رد کړې ده. پاکستان پر طالبانو تور لګوي چې د تحریک طالبان پاکستان په څېر ډلو ته په افغان خاوره کې ځای ورکوي؛ طالبان بیا دا تورونه ردوي.