د افغانستان او سریلانکا د ۱۹ کلنو لوبډلو ترمنځ د اسیا جام لوبه روانه ده
د ۲۰۲۶ کال د کرېکټ د ۱۹ کلنو اسیا جام په سیالیو کې د افغانستان او سریلانکا د ځوانو لوبډلو ترمنځ د «بي» ګروپ وروستۍ لوبه روانه ده. دا یو ورځنۍ سیالي د عمان په مسقط کې ترسره کېږي.
د لوبې پچه د سریلانکا لوبډلمشر ګټلې او پرېکړه یې کړې چې لومړی توپ اچونه وکړي. افغان لوبډله د خپلو منډو د پاڼۍ پر مهال تر ۱۹.۲ اوورونو وروسته د دوو لوبغاړو په سوځېدو ۹۳ منډې لري.
د افغانستان لپاره عابدالله عابد په ۵۵ منډو له میدان څخه وتلی دی. د لوبې په دې پړاو کې افغان لوبډله هڅه کوي چې د سیالۍ لپاره د منډو قوي هدف وټاکي، خو د پاڼۍ وروستی شمېر لا نه دی بشپړ شوی.
په دې سیالیو کې ټولې اته لوبډلې ګډون لري. افغانستان له سریلانکا، بنګلهدېش او مالیزیا سره په «بي» ګروپ کې شامل دی. افغان زلمیو تر دې مخکې بنګلهدېش او مالیزیا ته ماتې ورکړې او د دغو بریاوو له امله یې څلور پواینټونه ترلاسه کړي دي.
افغانستان د خپلو مخکینیو بریاوو له کبله نیمهپایلوبې ته د تګ ښه چانس لري، خو د سریلانکا لپاره د نن ورځې لوبه مهمه ده. سریلانکا له خپلو دوو تېرو لوبو یوه ګټلې او بله یې بایللې ده. بنګلهدېش هم، چې نن له مالیزیا سره لوبه کوي، له ورته وضعیت سره مخ دی.
په «الف» ګروپ کې پاکستان تېره ورځ هند ته په درېیو وېکټو ماتې ورکړه. پاکستان خپلې دواړه لوبې ګټلې دي، په داسې حال کې چې هند او متحده عربي اماراتو یوه یوه بریا لري او نیپال دواړه لوبې بایللې دي.
د دواړو ګروپونو څلور مخکښې لوبډلې به د نومبر پر ۱۲مه، چې د پنجشنبې له ورځې سره برابره ده، په نیمهپایلوبو کې سره مخامخ شي.