اسلامي همکاریو ټولنه او یونیسف په افغانستان کې د ګډو بشري هڅو پر پراختیا بحث کوي
په کابل کې د اسلامي همکاریو ټولنې د استازولۍ مشر محمد سعید العیاش او په افغانستان کې د ملګرو ملتونو د ماشومانو د ملاتړ صندوق (یونیسف) استازي تاجالدین اویواله د بشري او پرمختیايي همکاریو د پراختیا په اړه خبرې کړې دي.
د اسلامي همکاریو ټولنې د کابل دفتر د خبرپاڼې له مخې، دا لیدنه د نومبر پر اتمه د دې ټولنې په دفتر کې ترسره شوې ده.
په ناسته کې دواړو لوریو د ګډو ګټو پر موضوعاتو خپل نظرونه شریک کړي او په بېلابېلو برخو کې یې د همکارۍ شته فرصتونه ارزولي دي.
د خبرو یوه مهمه برخه په افغانستان کې د بشري اړتیاوو او پرمختیايي لومړیتوبونو ته د رسېدنې لپاره د اسلامي همکاریو ټولنې او یونیسف ترمنځ د اړیکو دوام او د ګډو هڅو پیاوړتیا وه.
د خبرپاڼې د معلوماتو له مخې، دواړو استازو ټینګار کړی چې د اړوندو موضوعاتو په برخه کې د بنسټونو ترمنځ همغږي او همکاري باید نوره هم پراخه شي.
دا لیدنه په داسې مهال شوې چې په افغانستان کې د بشري او پرمختیايي چارو لپاره د نړیوالو بنسټونو همکاري لا هم مهمه بلل کېږي.