رحمت شاه د ټیسټ لوبغاړو په نړیواله درجهبندۍ کې اووم شو
د افغانستان د کرکټ د ټیسټ او یو ورځنیو لوبډلو کپتان رحمت شاه د کرکټ نړیوالې شورا په نوې درجهبندۍ کې اووم مقام خپل کړی دی. نوموړی لومړی افغان لوبغاړی دی چې د ټیسټ سیالیو په نړیواله درجهبندۍ کې د لسو غوره لوبغاړو ترمنځ ځای نیسي.
د کرکټ نړیوالې شورا اعلان شوې درجهبندي د چهارشنبې په ورځ، د نومبر پر ۱۱مه، خپره شوه. رحمت شاه په وروستیو ټیسټ سیالیو کې د بنګلهدېش او زمبابوې پر وړاندې د خپلې ښې لوبې له امله د درجهبندۍ په لوړو ځایونو کې راغلی دی.
رحمت شاه د ۲۰۲۶ کال په ټیسټ سیالیو کې دوه سلیزې وهلې دي. هغه تر اوسه د افغانستان لپاره په ټیسټ لوبو کې پنځه سلیزې ثبت کړې دي، چې د هېواد د ټیسټ کرکټ په تاریخ کې د نوموړي د پام وړ لاسته راوړنو برخه جوړوي.
د معلوماتو له مخې، رحمت شاه تر دې دمه ۱۴ ټیسټ لوبې ترسره کړې او په دغو سیالیو کې یې ۱۳۷۲ منډې کړې دي. په دې منډو کې اووه پنځوسیزې هم شاملې دي. هغه خپله لومړۍ ټیسټ لوبه د ۲۰۱۸ کال د جون پر ۱۳مه د هند پر وړاندې ترسره کړې وه.
افغانستان تر دې وړاندې په یو ورځنیو او شلاوریزو سیالیو کې د راشد خان، محمد نبي، عظمتالله عمرزي او نورو لوبغاړو له لارې په نړیوالو درجهبندیو کې لوړ مقامونه لرلي دي. خو د ټیسټ سیالیو په درجهبندۍ کې د یوه افغان لوبغاړي اووم مقام ته رسېدل د هېواد لپاره لومړنۍ لاسته راوړنه بلل شوې ده.
رحمت شاه څو میاشتې مخکې د افغانستان د یو ورځنیو او ټیسټ لوبډلو کپتان وټاکل شو. ټاکل شوې وه چې افغانستان د نومبر پر ۱۲مه په متحده عربي اماراتو کې د زمبابوې پر وړاندې خپله دویمه ټیسټ لوبه پیل کړي.