په تاجیکستان کې افغان کډوال د قانوني اسنادو سربېره د نیول کېدو له وېرې بهر نه وځي
په تاجیکستان کې یو شمېر افغان کډوال وايي، سره له دې چې د استوګنې قانوني اسناد، د کډوالۍ کارتونه او ویزې لري، د نیول کېدو او له هېواده د ایستل کېدو له وېرې له خپلو کورونو نه شي وتلی.
د وحدت ښار دوو افغان کډوالو ازادي راډیو ته ویلي چې امنیتي کسان وخت ناوخت افغانان نیسي، د نیولو روښانه دلیل نه ورته وايي او د خوشې کېدو یا په تاجیکستان کې د پاتې کېدو لپاره ترې د پیسو غوښتنه کوي. دواړو سرچینو د امنیتي اندېښنو له امله خپل نومونه او اصلي غږونه نه دي خپاره کړي.
د یوه کډوال په وینا، افغان نارینه یوازې د لومړنیو اړتیاوو د توکو اخیستو لپاره له کوره وځي او ښځې هم په ډېره وېره بهر تګ کوي. هغه ادعا کړې چې په وروستیو ورځو کې یو شمېر افغانان له خپلو کاري ځایونو نیول شوي او ځینې کسان له تاجیکستانه ایستل شوي دي.
بل کډوال وايي، دا وضعیت له څه باندې دوو کلونو راهیسې وخت ناوخت دوام لري. هغه ادعا کړې چې ځینو نیول شویو کسانو ته ویل شوي وو، یا دې ډېرې پیسې ورکړي او یا به له هېواده وایستل شي. ازادي راډیو وايي، د افغانانو له لوري د پیسو اخیستلو ادعاوې یې په خپلواکه توګه نه دي تایید کړې او د تاجیکستان چارواکو تر اوسه په دې اړه رسمي څرګندونې نه دي کړې.
تاجیکستاني چارواکو تر دې وړاندې د افغان کډوالو د جبري ایستلو راپورونه رد کړي وو. د کډوالو چارو د کمېټې مشر مصور بهادري د ۲۰۲۵ کال په جولای کې دا ډول راپورونه بېبنسټه بللي او ویلي یې وو چې په دې تړاو کوم رسمي شکایت نه دی ثبت شوی. د دغه هېواد د ملي امنیت دولتي کمېټې هم ویلي چې له ۱۰ زرو ډېرې افغانې کورنۍ، چې قوانین مراعتوي، په تاجیکستان کې په قانوني او ارام ډول ژوند کوي.
خو د ملګرو ملتونو د کډوالو عالي کمېشنرۍ د شمېرو له مخې، د ۲۰۲۶ کال د اکتوبر تر ۲۴مې پورې ۱،۴۳۰ افغان وګړي له تاجیکستانه افغانستان ته ایستل شوي دي. تاجیکستاني امنیتي چارواکو ویلي چې ځینې افغانان د نشهيي توکو د قاچاق، له ترهګرو ډلو سره د اړیکو، د ماشومانو پر وړاندې د جنسي جرمونو او د اسنادو د جعل په تور نیول او ایستل شوي؛ خو د دغو قضیو موده او شمېر یې نه دی روښانه کړی.
د خجند له یوې جنایي پېښې وروسته، چې یو افغان وګړی پکې د یوې تاجیکې ښځې د وژنې په تور نیول شوی و، د سغد ولایت د شاوخوا ۲۵۰ افغان کورنیو د نیولو او ایستلو راپورونه هم خپاره شول. یو شمېر کډوالو پر دې موضوع د ډلهییز توپیري چلند اندېښنه څرګنده کړې وه.
UNHCR په منځنۍ اسیا کې د هغو کډوالو پر حقوقي زیانمننې اندېښنه ښودلې چې د دې ادارې له خوا ثبت شوي، خو کوربه حکومتونو نه دي پېژندلي. په تاجیکستان کې افغان کډوال وايي، د افغانستان د امنیتي وضعیت له امله بېرته ستنېدل ورته خطرناک دي او لا هم د خپلو دوسیو د څېړنې او درېیمو هېوادونو ته د لېږد په تمه دي.