ماهیپر ستورو په شپږو وېکټو خپله لومړۍ بریا ترلاسه کړه

ماهیپر ستورو د 2026 کال د احمدشاه ابدالي فرسټ کلاس سیالیو لومړۍ بریا په ننګرهار کې د میوند اتلانو پر وړاندې په شپږو وېکټو ترلاسه کړه.

یمین احمدزي شپږ او ابراهیم عبدالرحیمزي څلور وېکټې واخیستې او میوند یې په 71 منډو وسوځاوه. ماهیپر په ځواب کې د ریاض حسن او محمد اسحاق د نیمه سلیزو په مرسته 199 منډې وکړې.

د اعجاز احمدزي ناسوځېدلو 110 منډو په دویمه پاڼۍ کې د میوند مقاومت پیاوړی کړ، خو ماهیپر ته د بریا 96 منډې پاتې شوې. هغوی هدف د څلورو لوبغاړو په سوځېدو پوره کړ. عبدالرحیمزی په دواړو پاڼیو کې د نهو وېکټو له امله د لوبې غوره لوبغاړی شو.