افغانستان له روسي شرکتونو د کانونو او بنسټیزو پروژو د پانګونې غوښتنه وکړه
د ریاستالوزراء اقتصادي مرستیال ملا عبدالغني برادر له روسي شرکتونو غوښتي چې په افغانستان کې د کانونو، صنعتي تولید، بېخبناوو او نورو اقتصادي پروژو په برخو کې پانګونه وکړي. نوموړي ویلي، افغانستان د ګډو پانګونو لپاره پراخ ظرفیتونه لري.
ملا برادر دا څرګندونې د روسیې د لومړي وزیر له مرستیال الکسي اوورچوک سره په لیدنه کې کړې دي. د هغه په وینا، افغانستان چمتو دی چې د کورنیو شریکانو په همکارۍ د روسي شرکتونو پانګونې ته زمینه برابره او هرکلی یې وکړي.
د اقتصادي مرستیال له نظره، د کانونو استخراج، د صنعتي کارخونو جوړول او پراخول، د بېخبناوو پراختیا او د ځانګړو اقتصادي سیمو رامنځته کول د دواړو هېوادونو د ګډې پانګونې مهمې برخې کېدای شي. هغه د نړیوالو معیارونو له مخې د صنعتي پارکونو جوړول هم د همکارۍ له مناسبو ساحو څخه بللي دي.
ملا برادر د ګډو ځانګړو اقتصادي سیمو، وچو بندرونو او سوداګریزو بنسټونو جوړول او پراختیا هم د پانګونې په هغو برخو کې شامل کړي چې د افغانستان او روسیې ترمنځ د اقتصادي اړیکو د پراخېدو لپاره ارزښت لري. نوموړي ټینګار کړی چې افغانستان غواړي د دواړو هېوادونو د اقتصادي وړتیاوو پر بنسټ دوه اړخیزه سوداګري تر ټولو لوړې کچې ته ورسوي.
هغه د سوداګرۍ د اسانتیاوو رامنځته کول او د پانګونې پراخول د دې هدف د ترلاسه کولو لپاره مهم بللي دي. د نوموړي په څرګندونو کې د افغانستان ستراتیژیک موقعیت، طبیعي زېرمې او د کار په عمر کې شاوخوا ۲۴ میلیونه وګړي د هېواد له مهمو اقتصادي ظرفیتونو څخه یاد شوي دي.
د ریاستالوزراء اقتصادي مرستیال ویلي، دغه ظرفیتونه کولای شي بهرنیو پانګهوالو ته د صنعت، د کاري فرصتونو د رامنځته کولو او اقتصادي ودې په برخو کې د پام وړ زمینه برابره کړي. دا لیدنه په داسې وخت کې شوې چې افغانستان هڅه کوي د بهرنۍ پانګونې په راجلبولو او له سیمهییزو او نړیوالو هېوادونو سره د اقتصادي اړیکو په پراخولو سره خپله سوداګري او اقتصاد پیاوړي کړي.