متقي او کابلوف د افغانستان او روسیې د سوداګریزو اړیکو پر پراختیا وغږېدل
د افغانستان بهرنیو چارو وزیر امیرخان متقي په کابل کې د افغانستان لپاره د روسیې د ولسمشر له ځانګړي استازي ضمیر کابلوف سره د دواړو هېوادونو د اړیکو او سوداګرۍ د پراختیا په اړه خبرې کړې دي.
د افغانستان د بهرنیو چارو وزارت د خبرپاڼې له مخې، په دې لیدنه کې د سوداګرۍ د کچې لوړولو او په اقتصادي برخه کې د شته فرصتونو د اغېزمنې کارونې پر لارو چارو هر اړخیز بحث شوی دی.
متقي له روسیې سره د اړیکو پراختیا مهمه بللې او ویلي یې دي چې کابل او مسکو باید د متقابلو ګټو پر بنسټ له اقتصادي او سوداګریزو فرصتونو اعظمي ګټه واخلي. د وزارت په بیان کې د مشخصو سوداګریزو پروژو یا د راکړې ورکړې د حجم په اړه نور جزئیات نه دي ورکړل شوي.
د روسیې ځانګړي استازي په افغانستان کې وروستي پرمختګونه او د نشهيي توکو پر وړاندې د اسلامي امارت هڅې ستایلې دي. کابلوف، د بهرنیو چارو وزارت په حواله، ویلي چې د دې مبارزې په اړه د ځینو نړیوالو ادارو راپورونه له واقعیتونو سره سمون نه لري.
متقي په دې لیدنه کې ټینګار کړی چې اسلامي امارت د نشهيي توکو د کښت، تولید او قاچاق پر وړاندې جدي او دوامدارې مبارزې ته ژمن دی. نوموړي دغه اقدامات د افغانستان او ټولې سیمې لپاره مهم بللي دي.