د افغان کرکټ د مینه‌والو کورEnglish ↗
افغان اتلان
کورپاڼه خبرونه

افغانستان او ایران د کرنیزو صادراتو او سوداګرۍ پر پراختیا خبرې وکړې

افغان اتلان · پښتو
افغانستان او ایران د کرنیزو صادراتو او سوداګرۍ پر پراختیا خبرې وکړې

د افغانستان د مالیې وزیر او د دوه‌اړخیزو همکاریو د اقتصادي کمیسیون رئیس، محمد ناصر آخوند، ایران ته د خپل رسمي سفر پر مهال د دغه هېواد د کرنې له وزیر غلام‌رضا نوري قزلجه سره لیدلي دي.

د افغانستان د مالیې وزارت په خبرپاڼه کې ویل شوي، چې په دې لیدنه کې د دواړو هېوادونو د اقتصادي کمیسیون د راتلونکې غونډې پر جوړېدو او د هغې لپاره د چمتووالي په اړه خبرې وشوې.

دواړو لوریو ایران ته د افغان کرنیزو محصولاتو د صادراتو، د ګمرکونو د ۲۴ ساعته فعالیت او د افغان سوداګرو د ستونزو د حل پر لارو چارو هم بحث کړی دی.

په غونډه کې د ناقانونه توکو د قاچاق د مخنیوي ترڅنګ، پر یو شمېر نورو سوداګریزو او اقتصادي موضوعاتو هم خبرې شوې دي. د وزارت د معلوماتو له مخې، دا بحثونه د دواړو هېوادونو ترمنځ د سوداګریزو اړیکو له مهمو برخو سره تړاو لري.

د ایران د کرنې وزیر له افغانستان سره د کرنې، مالدارۍ او اوبولګولو په برخو کې د همکاریو ډاډ ورکړی او د اقتصادي کمیسیون د راتلونکې غونډې لپاره یې پر چمتووالي ټینګار کړی دی.