د عراق پارلمان افغانستان ته د تېلو د احتمالي قاچاق د څېړنې لپاره کمېټه جوړوي
د عراق پارلمان د هغو استخباراتي راپورونو د څېړلو لپاره یوه لنډمهاله کمېټه جوړه کړې چې له مخې یې د کرکوک او کردستان سیمې تېل د ایران له لارې افغانستان ته قاچاق کېږي.
عراقي رسنیو د چهارشنبې په ورځ راپور ورکړی چې د پارلمان رئیس هیبت الحلبوسي د دې موضوع د څېړنې لپاره د موقتي کمېټې د جوړېدو پرېکړه کړې ده.
د راپورونو له مخې، الحلبوسي له امنیتي ادارو او د عراق له تېلو وزارت څخه د یادو ادعاوو په تړاو د وضاحت غوښتنه کړې ده.
تر اوسه په خپرو شویو معلوماتو کې د قاچاق د څرنګوالي، د تېلو د اندازې او یا د دې ادعاوو د کرهوالي په اړه نور جزئیات نه دي وړاندې شوي.
د پارلماني کمېټې د کار موخه دا ده چې د استخباراتي راپورونو محتوا او د اړوندو عراقي ادارو احتمالي مسئولیتونه وڅېړي.