په کابل کې د اسلامي همکاریو سازمان د ډیپلوماسۍ پر رول علمي ناسته وشوه

د اسلامي همکاریو سازمان د دفتر عمومي رییس او سفیر، ډاکټر محمد بن سعید العیاش، د افغانستان د بهرنیو چارو وزارت د ډیپلوماسۍ په انستیتوت کې د دې سازمان د ډیپلوماسۍ او هڅو په اړه علمي وینا کړې ده.

په دې ناسته کې د بهرنیو چارو وزارت د کارکوونکو ترڅنګ د بېلابېلو وزارتونو او امارتي ادارو یو شمېر مسوولانو هم ګډون کړی و. العیاش د عامه او څو اړخیزې ډیپلوماسۍ پر ارزښت، مهمو وسایلو او کاري میکانېزمونو خبرې وکړې.

هغه ګډونوالو ته د اسلامي همکاریو سازمان د تاریخ، اداري جوړښت او تشکیلاتي برخو په اړه معلومات ورکړل. نوموړي همدارنګه د سازمان په سرمشریزو او د بهرنیو چارو وزیرانو په غونډو کې د افغانستان په اړه د شویو پرېکړو په اړه څرګندونې وکړې.

د اسلامي همکاریو سازمان د دفتر عمومي رییس وویل، په کابل کې د دغه سازمان دفتر د افغانستان په اړه د شویو پرېکړو د پلي کېدو بهیر څاري. د هغه د وینا یوه برخه په بېلابېلو برخو کې د افغانستان د ملاتړ لپاره د سازمان هڅو او رول ته ځانګړې شوې وه.

العیاش په خپله وینا کې د سازمان د فعالیتونو او د افغانستان په اړه د هغه د دریځونو په تړاو نور وضاحتونه هم وړاندې کړل. په ناسته کې پر دې موضوعاتو د ګډونوالو ترمنځ بحث وشو.

د غونډې په پای کې ګډونوالو خپلې پوښتنې او لیدلوري شریک کړل او د مطرح شویو موضوعاتو په اړه یې هر اړخیز بحث وکړ.