ښاغلي سردار ولي څرک دارواښاد سيدعلي زوى پر کال ( ١٣٦٢) لمريز دجلال آباد ښار په روښان مېنه کې زوکړى دى . نوموړى  له آره دچپليار ولسوالۍ دهديا خيلو دسېمې اوسيدونکى دى .
سردار لا ماشوم و چې کورنۍ يې پاکستان ته مهاجره شوه ، او له څو ځايه کډو ګرځولو وروسته يې دشمشتو په کيمپ کې  دنورو ډېرو افغانانو په څېر واړول . پلار غريب يې يو او بل ځاى مزدوري کوله او خپلوچيو ته يې دبيګا او سبا نفقه برابروله . په پردي وطن  دبې وزلۍ شپې ورځې تېريدي ، سردار دشپږو کالو شو خو لا ښوونځي کې شامل شوي نه و چې پلاريې د ( ١٣٦٨ ) لمريز کال دلوى اختر په دويمه چې دجمعې مبارکه ورځ وه پرداسې مهال چې دجمعې لمانځه ته يې اودس کاوه چې عزرايئل يې له دې ستړې نړۍ سره دتل لپاره اړيکې وشلولې (( روح يې په جنت کې )).
دپلار له مړينې وروسته يې دکورنۍ پالنه د سپين سرې نيا په سر شوه . ښه مې ياد دي چې همدې سپين سرې ادې يې سردار په  شمشتو کې ديتيمانو لومړني ښوونځي (( دارالفرقان )) ته راووست او په زده کړو يې بوخت کړ .

نوموړي لومړنۍ زده کړې په دارالفرقان ، منځنۍ هغه يې د جلال اباد ښار په نصرت ښوونځي کې او دثانوي زده کړو بري ليک يې پر کال ( ١٣٨٢ ) لمريز له ميا عمر لېسې واخيست .
د همدې کال دکانکور له ازموينې وروسته نوموړى دننګرهار پوهنتون دکرنې پوهنځي ته بريالى شو خو  دلوړو زده کړو له نعمته خپلې بې کسۍ او بې وسۍ لري کړ . او پرځاى يې ددندې موندنې په لټه کې شو .شاعري يې له  (١٣٧٧) لمريز راهيسې پيل کړې چې تر دې دمه يې پر دې ټولګه  (( ستا داقرار په تمه شپې تېروم )) سربېره يو شمير نور شعرونه او يوه وړه ټولګه لنډې کيسې هم ليکلي .
څرک له بېلا بېلو دولتي او نا دولتي خپرونو ، تلويزيوني چينلونو او اژانسونو سره دخبريالۍ تر لنډ مهاله دندو وروسته اوس  دننګرهار علمي او فرهنګي مرکز ((مديوتيک)) له خوا د خپرنيز ارګان (( ننني افغانستان )) مرستيال دى.
په پاى کې څرک ته ددې ټولګې دخپريدا مبارکي وايم او په فرهنګي چارو کې يې دزياتو برياوو په هيله .