فطرت: له بهرني ملاتړ جوړې شوې نمایشي جبهې د افغانانو استازیتوب نه کوي
کابل — د افغانستان د وسلهوال پوځ لوی درستیز قاري محمدفصیحالدین وايي، اسلامي امارت اوس یوه خپلواکه اردو لري او هغه ډلې چې د بهرنیو ملاتړونو په مرسته یې د مقاومت یا ازادۍ په نوم جبهې جوړې کړې، د ده په باور د افغانانو استازیتوب نه کوي.
فطرت دا څرګندونې په کابل کې د عبدالله بن مسعود رضیاللهعنه د جګړهییزو ګډو زدهکړو قوماندانۍ د نوو سرتېرو د فراغت په مراسمو کې وکړې. هغه ادعا وکړه چې یادې ډلې د پاکستان په ملاتړ او امر غواړي افغان ولس وځوروي او په هېواد کې اندېښنې رامنځته کړي.
د وسلهوال پوځ لوی درستیز فارغو سرتېرو ته وویل چې د هر ډول تېري پر وړاندې دې بشپړه چمتووالی ولري او له خپلې خاورې څخه دې دفاع وکړي. نوموړي له هغوی وغوښتل چې خپل پوځي توان لوړ او د دښمنانو پر وړاندې خپله امادګي څرګنده کړي.
قاري محمدفصیحالدین وویل، اسلامي امارت هڅه کړې چې په عصري وسایلو سمبال او تعلیمیافته اردو جوړه کړي. د هغه په وینا، اوس د افغانستان وسلهوال پوځ د هېواد د دفاع لپاره خپلواکه اردو ده. نوموړي د خپلو خبرو په یوه برخه کې پر هغو کسانو نیوکه وکړه چې له هېواده بهر مېشت دي او د نورو هېوادونو په ملاتړ په افغانستان کې تخریبي فعالیتونه ترسره کوي.
هغه له بهر مېشتو افغانانو وغوښتل چې هېواد ته ستانه شي او په ارام او عزتمند ډول ژوند وکړي. فطرت ټینګار وکړ چې افغانان باید د پردیو د ګټو لپاره ونه کارول شي او په هېواد کې دې د نورو په اشاره له تخریبي کړنو ډډه وشي.
په همدې مراسمو کې د هېواد له بېلابېلو سرحدي ولایتونو څخه د اسلامي اردو لیکو ته جذب شوي ۱۱۰۰ ځوانان له څلور میاشتنیو مسلکي، نظري او عملي زدهکړو وروسته فارغ شول. فارغینو پوځي نندارې وړاندې کړې او د افغانستان په بېلابېلو سرحدي سیمو کې یې د خدمت او د هېواد د پولو د دفاع لپاره چمتووالی وښود.