ترکي معارف بنسټ په افغانستان کې د ښوونیزو خدمتونو د پراختیا پلان اعلان کړ
د ترکیې معارف بنسټ په افغانستان کې د خپلو ښوونیزو فعالیتونو د پراخولو او د زدهکوونکو د شمېر د زیاتولو پلان اعلان کړی دی. دغه بنسټ وايي، اوس مهال یې په هېواد کې له شپږ زرو ډېر زدهکوونکي لري او غواړي په نږدې راتلونکې کې دا شمېر اته زرو ته ورسوي.
د بنسټ مرستیال استازي ابراهیم فاتح ګوچلو دا څرګندونې د میدان وردګو ولایت په افغان ـ ترک ښوونځي کې د ساینسي پروژو د نندارتون د پرانیستې پر مهال کړې دي. هغه ویلي، د بنسټ اوسني فعالیتونه د هلکانو لېسو، لومړنیو ښوونځیو او وړکتونونو برخې رانغاړي.
ګوچلو زیاته کړې چې په یو شمېر ولایتونو کې د نویو ښوونځیو د پرانیستلو لپاره هڅې روانې دي او خوست یې له هغو سیمو بللی چې هلته د یوه نوي ښوونځي د جوړولو پلان شته. د سرچینې د معلوماتو له مخې، په تخار کې هم د ښوونیزو فعالیتونو د پراختیا موضوع مطرح شوې ده.
په میدان وردګو کې د زدهکوونکو په جوړو شوو پروژو کې د مصنوعي ځیرکتیا، ډرونونو او نورو نوښتګرو برخو اړوند ۲۵ علمي او ساینسي کارونه نندارې ته وړاندې شول. دا پروژې د زدهکوونکو د نوښت او خلاقیت د ودې په موخه جوړې شوې وې؛ خو تر اوسه روښانه نه ده چې د ترکیې معارف بنسټ به د دغو ټکنالوژیو لپاره عملي روزنیز پروګرامونه هم پراخ کړي که نه.
د بنسټ مشر احمد توکور د اکټوبر په لومړیو کې ویلي وو چې په افغانستان کې د دغه بنسټ ښوونیزو خدمتونو ته د خلکو لېوالتیا زیاته ده او ښايي د امکاناتو او ښوونیز معیار موضوع د دې لېوالتیا له لاملونو څخه وي. هغه ویلي، د ۲۰۱۸ کال د یوې هوکړې له مخې تمه ده چې افغان ـ ترک ښوونیز بنسټ په ټولو ۳۴ ولایتونو کې خپل خدمتونه پیل کړي؛ خو د دې کار عملي کېدل به د اړتیاوو، غوښتنو او شته فرصتونو له ارزونې وروسته ترسره شي.
ترکیې معارف بنسټ، چې د سرچینې په وینا د نړۍ په ۶۴ هېوادونو کې ښوونیز خدمتونه لري، اعلان کړی چې په ۲۰۲۷ کال کې به په خوست کې نوی ښوونځی او په کابل کې د پوهنتون په کچه یو پوهنځی پرانیزي. دا پلانونه په داسې حال کې مطرح کېږي چې په افغانستان کې د زدهکړو غوښتنه پراخه ده، خو د پوهنې او لوړو زدهکړو په برخو کې د کیفیت او لاسرسي ستونزې لا هم دوام لري.