کابل له واشنګټنه پاکستان ته د افغان کډوالو د احتمالي لېږد په اړه د احتیاط غوښتنه کوي
د افغانستان د بهرنیو چارو وزارت پاکستان ته د هغو افغان کډوالو د احتمالي لېږد په اړه د امریکا پر راپور شوي پلان اندېښنه ښودلې چې په پاکستان کې د قانوني اقامت اسناد نه لري.
وزارت په یوه خبرپاڼه کې ویلي، د راپورونو له مخې ښايي امریکا یو شمېر افغان وګړي پاکستان ته ولېږدوي. د وزارت په وینا، په دې ډله کې هغه کسان شاملېدای شي چې اوس د پاکستان د کډوالۍ په توقیفخونو کې ساتل کېږي.
د بهرنیو چارو وزارت ټینګار کړی چې له افغانانو سره باید په هر هېواد کې د نافذه قوانینو، منل شوو اصولو او انساني کرامت پر بنسټ چلند وشي. دغه وزارت ویلي، د افغان اتباعو د حقونو ساتنه خپل مسوولیت ګڼي.
وزارت له امریکا غوښتي چې د دې موضوع په اړه مسوولانه او سنجول شوی دریځ غوره کړي. د خبرپاڼې له مخې، د افغان اتباعو د برخلیک اړوند هر ډول پرېکړه باید د روښانه دوهاړخیز تفاهم، لازمې همغږۍ او د اړوندو کسانو د حقونو او مشروع غوښتنو په پام کې نیولو سره وشي.
په خبرپاڼه کې ویل شوي، افغان لوری چمتو دی چې د موجودو واقعیتونو او د دواړو خواوو د مشروع اندېښنو پر بنسټ له امریکا سره عملي او د متقابل تفاهم پر محور تعامل وکړي. وزارت همداراز ویلي، درېیم هېوادونه باید د لنډمهاله امتیازونو یا نورو ملاحظاتو لپاره د بل هېواد د اتباعو پر برخلیک معامله ونه کړي.
د افغانستان بهرنیو چارو وزارت زیاته کړې چې اسلامي امارت د افغانانو د باعزته، خوندي او داوطلبانه راستنېدو په برخه کې هر ډول رغنده همکارۍ ته ژمن دی او د هغوی د حقونو او خوندیتوب تأمین خپل مسوولیت بولي.
دا څرګندونې وروسته له هغې شوې چې بلومبرګ راپور ورکړی و، د امریکا حکومت ښايي په پاکستان کې له امریکايي ځواکونو سره د همکارو افغانانو د کورنیو د ځینو غړو په ګډون، یو شمېر افغانان دغه هېواد ته ولېږدوي.