د پاکستان عام خلک رېښتیا ښه خلک دي؟

کبیر هسک
په افغانانو کې دا خبره زیاته رواج شوې، چې د پاکستان حکومتونه که هر څنګه وي، عام خلک یې ښه خلک دي.
خو دا بحث ولې رامنځته شوی او ولې ډېر ځله چې د پاکستان خلاف خبره کیږي، ځینې خلک سمدستي د پاکستان د عامو خلکو په صفت خوله خلاصوي؟
په دې اړه به لږه دلته زړه خواله سره وکړو.
اصولاً هیڅوک حق نه لري او دا ممکنه هم نه ده، چې څوک د یوه هېواد یا ملت د ټولو خلکو د ښه والي او بدوالي پوښتنه، تبصره او قضاوت وکړي.
ځکه هر هېواد او ملت ښه خلک هم لري، نا ښه هم، بل دا بې مورده بحث دی چې څوک یو مخ د یوه هېواد خلک وارزوي او د کړنو په اړه یې بحث او خبرې وکړي.
خو دا چې د پاکستان په اړه د بحث پر مهال سمدستي د عامو خلکو د ستاینې بحث را مخته کیږي، دا یو ژور استخباراتي تکتیک دی چې د پاکستان واکمنو بنسټونو له خپل پیدایښته تر ننه لوبولی او په خاص ډول خپل افغان تابعداران یې په همداسې روایتونو خپل ذهني غلامان ساتلي.
زه نه وایم چې د پاکستان عام خلک به ښه نه وي او که ښه هم وي، ما ته د یوه افغان په حیث د دوی ټول ښه والی زما د وطن د یوې خښتې د نړیدو هومره ارزښت نه لري.
هوښیار ملتونه د خپل دوست و دښمن په اړه واحد دریځ لري، له واحد دریځ څخه یې اساساً مشروع او مالک نظامونه مثبت او منفي روایتونه ایجادوي، د اړیکو مراجع واحدې وي او له دې اخوا څوک حق نه لري چې د کوم هېواد، خاصتاً پاکستان غوندې هېواد په اړه له ملي او نهادي اړیکو ور اخوا شخصي – سیاسي اړیکې، روایتونه او لابي ګرۍ ولري.
هغوی چې د پاکستان د خلکو ستاینې کوي یا خو پاخه پاکستاني غلامان دي یا پاخه لوده ګان، چې د استخباراتي ډنډورچیانو په ببولالو غولیدلي او په داسې باورونو د خپل ملي هویت او روایت سپکاوی کوي.
څوک چې درته داسې وایي ورنه پوښتنه وکړئ، چې د افغانستان عام خلک څه ستونزه لري چې د پاکستاني مفتیانو او ذلیلانو په منافقت او شرارت دا څو لسیزې وژل کیږي، ځپل کیږي، بې وطنه کیږي او د اور په تبۍ ناست دي؟
د دوی منظور که له دې خبرو دا وي، چې د پاکستان عام خلک دې د افغان لوري له ممکنه خطرونو او غچ اخیستو خوندي وي، بیا خو ډېر پرېوتي او تش په نامه افغانان دي، ځکه د خپل وطن پر ګټو د نورو ګټې ورته لومړیتوب لري.