کابل او اسلاماباد لا هم د کړکېچ د سولهییز حل پر لاره هوکړې ته نه دي رسېدلي
د طالبانو حکومت ویاند ذبیحالله مجاهد وايي، له پاکستان سره د روان کړکېچ د هواري لپاره د ګڼو هڅو او پیغامونو له تبادلې سره سره، لا هم د جوړجاړي زمینه نه ده برابره شوې. نوموړي ادعا کړې چې د دې وضعیت یو مهم لامل د پاکستاني چارواکو پر هغو تګلارو ټینګار دی چې د ده په باور، مخکې ناکامې شوې دي.
مجاهد له حریت راډیو سره په مرکه کې ویلي، د افغانستان حکومت غواړي ستونزې د خبرو او سولهییزو لارو حل شي او دا کړکېچونه د افغانستان له لوري نه دي رامنځته شوي. هغه زیاته کړې چې د دواړو هېوادونو ترمنځ د شخړې د پای ته رسولو لپاره د بېلابېلو هېوادونو منځګړیتوبونو او تماسونو تر اوسه کومه څرګنده پایله نه ده لرلې.
ترکیې، چین، قطر او متحده عربي اماراتو په بېلابېلو پړاوونو کې د کابل او اسلاماباد ترمنځ د منځګړیتوب هڅې کړې دي. د سرچینې د معلوماتو له مخې، په پاکستان کې د ناامنیو او بریدونو له زیاتېدو سره هممهاله د دواړو هېوادونو ترمنځ راپورته شوی کړکېچ لا پر خپل ځای پاتې دی.
پاکستاني چارواکو د مجاهد د تازه څرګندونو په اړه تر اوسه رسمي غبرګون نه دی ښودلی، خو اسلاماباد مخکې څو ځله ویلي چې تر هغه به له کابل سره اړیکې عادي نه کړي، څو د دوی په وینا د افغانستان خاوره د پاکستان پر ضد د بریدونو لپاره کارېږي. په ملګرو ملتونو کې د پاکستان دایمي استازولۍ هم دا غوښتنه بیا تکرار کړې ده.
د یادې استازولۍ په خبرپاڼه کې د دغه استازي سلاکار محمد جواد اجمل ویلي، د طالبانو حکومت باید هغو ډلو ته د فعالیت اجازه ورنه کړي چې د افغانستان له خاورې د پاکستان او سیمې پر ضد فعالیت کوي. نوموړي دا څرګندونې د ملګرو ملتونو د عمومي اسمبلۍ د درېیمې کمېټې په هغې غونډه کې کړې چې د افغانستان د بشري وضعیت په اړه جوړه شوې وه.
اجمل په همدې غونډه کې د ښځو او نجونو پر وړاندې د محدودیتونو د پای ته رسولو او د طالبانو حکومت له خوا د نړیوالو ژمنو او مکلفیتونو د پوره کولو غوښتنه هم کړې ده. هغه د پاکستاني طالبانو تحریک، د بلوچستان د ازادۍ غورځنګ، القاعدې، داعش خراسان او د ختیځ ترکستان اسلامي غورځنګ نومونه اخیستي او ادعا یې کړې چې دغه ډلې له افغانستانه فعالیت کوي.
د طالبانو حکومت دغه تورونه په وار وار رد کړي او وايي هېچا ته اجازه نه ورکوي چې د افغانستان خاوره د بل هېواد پر ضد وکاروي. کابل، برعکس، پر پاکستان تور پورې کوي چې د دوی د مخالفو وسلهوالو ملاتړ کوي او داعش ډلې ته یې مرکزونه برابر کړي دي؛ اسلاماباد د دغو ادعاوو په اړه په دې راپور کې نوی غبرګون نه دی ورکړی.