متقي: د نشهيي توکو پر ضد مبارزې لپاره بزګرانو ته د بدیل معیشت مرستې کافي نه دي

د افغانستان د بهرنیو چارو وزیر امیرخان متقي وايي، نړیوالې ټولنې د نشهيي توکو پر وړاندې د افغانستان د مبارزې د ملاتړ لپاره له بزګرانو سره د بدیل معیشت په برخه کې لازمې مرستې نه دي کړې.
د بهرنیو چارو وزارت په خبرپاڼه کې راغلي، چې متقي دا څرګندونې د افغانستان لپاره د اروپايي ټولنې له نوي ټاکل شوي ځانګړي استازي، ټوماس فریلیسن، سره په لیدنه کې کړې دي.
د خبرپاڼې له مخې، په دې ناسته کې د افغانستان پر امنیتي وضعیت، د نشهيي توکو پر وړاندې د مبارزې پر بهیر او یو شمېر بشري او سیاسي موضوعاتو خبرې شوې دي. متقي د بدیل معیشت موضوع د نشهيي توکو د مخنیوي له هڅو سره تړلې مهمه مسئله وبلله.
د افغانستان د بهرنیو چارو وزارت د ادعا له مخې، بزګرانو ته د بدیلو عایداتي لارو په برابرولو کې نړیوال ملاتړ تر اوسه د اړتیا له کچې کم و. وزارت د دې مرستو لپاره کومه مشخصه کچه یا د ترسره شویو پروژو جزئیات نه دي ورکړي.
فریلیسن په لیدنه کې د امنیت د ټینګښت او د نشهيي توکو پر وړاندې د مبارزې په برخه کې د اسلامي امارت لاستهراوړنې ستایلې دي. نوموړي ویلي، چې د افغانستان امنیت او له نشهيي توکو سره مبارزه د اروپايي ټولنې د رسمي دریځ له مهمو برخو څخه دي.
د اروپايي ټولنې ځانګړي استازي همداراز ډاډ ورکړی، چې دغه ټولنه به له افغانستان سره په بېلابېلو برخو کې د خپلو همکاریو د پراخولو هڅې وکړي. په خبرپاڼه کې د دې احتمالي همکاریو مشخصې برخې او مهالوېش نه دي یاد شوي.