افغانستان او زېمبابوې د درېهېوادیزې لوبلړۍ د اتلولۍ لپاره مخامخ کېږي
د افغانستان کرېکټ ملي لوبډله نن د متحدو عربي اماراتو په شارجه لوبغالي کې د درېهېوادیزې یو ورځنۍ لوبلړۍ په پایلوبه کې له زېمبابوې سره مخامخېږي. ټاکل شوې چې دا لوبه د افغانستان پر وخت د مازیګر په څلورو بجو پیل شي.
په دې سیالیو کې بنګلهدېش درېیمه لوبډله وه، خو له افغانستان او زېمبابوې څخه له ماتې وروسته یې د پایلوبې له فرصت څخه پاتې شو. افغانستان د لومړي پړاو دواړه لوبې په بریا پای ته رسولې او د پایلوبې لپاره یې د پام وړ چمتووالی ښودلی دی.
افغان لوبډلې خپله وروستۍ لوبه دوه ورځې مخکې په شارجه کې له بنګلهدېش څخه په اوو وېکټو وګټله. تر دې وړاندې یې زېمبابوې ته په همدې لوبلړۍ کې د ۱۵۸ منډو په توپیر ماتې ورکړې وه. زېمبابوې بیا د لوبلړۍ په پرانیستونکې لوبه کې بنګلهدېش ته په ۹۹ منډو ماته ورکړې وه.
د افغانستان او زېمبابوې د مخامخ یو ورځنیو سیالیو په سابقه کې هم افغان لوبډله مخکې ده. دواړو هېوادونو تر نننۍ لوبې وړاندې ۳۱ یو ورځنۍ سیالۍ کړې دي چې افغانستان پکې ۲۱ بریاوې لري. سرچینه وايي، زېمبابوې په تېرو اتو کلونو کې د افغانستان پر وړاندې یوه پنځوس اوریزه لوبه هم نه ده ګټلې.
سره له دې سابقې، د افغانستان د ملي لوبډلې مشر روزونکی ریچارډ پایبس ټینګار کړی چې د پایلوبې پر مهال د دواړو لوبډلو شرایط نږدې برابر وي. نوموړي ویلي، دا لوبه اسانه نه ده او افغان لوبډله باید ښه چمتووالی ونیسي او خپل غوره کرېکټ وړاندې کړي.
دا پایلوبه په شارجه کې د تېرو ۲۳ کلونو په موده کې د نړیوالو یو ورځنیو سیالیو د یوه ټورنمنټ لومړۍ پایلوبه بلل کېږي. افغانستان به هڅه وکړي چې د لومړي پړاو بریاوې په اتلولۍ بدلې کړي، خو زېمبابوې به د سیالۍ له لارې د لوبلړۍ د سرلیک د ګټلو هڅه وکړي.