د ترکژبو هېوادونو سازمان: افغانستان کې د سولې او پراختیا هڅې باید دوام وکړي
د ترکژبو هېوادونو سازمان غړو هېوادونو په افغانستان کې د سولې، ثبات او دوامدارې پراختیا د ملاتړ لپاره د ګډو هڅو پر دوام ټینګار کړی دی.
دغه څرګندونې د سازمان د دیارلسمې سرمشریزې په پای کې په خپره شوې ګډه اعلامیه کې شوې دي. سرمشریزه د جمعې په ورځ، د اکټوبر په ۳۰مه، د ترکیې په پلازمېنه انقره کې د «د ترک پېړۍ؛ په ژبه، فکر او عمل کې یووالی» تر سرلیک لاندې جوړه شوې وه.
د انادولو خبري اژانس د راپور له مخې، د غونډې ګډونوالو د «انقرې اعلامیه» لاسلیک کړې ده. په اعلامیه کې ویل شوي چې غړي هېوادونه به د ترکژبو هېوادونو سازمان په چوکاټ کې، د افغانستان د کاري ډلې په ګډون، خپلو ګډو هڅو ته دوام ورکړي.
د اعلامیې له مخې، د دغو هڅو موخه په افغانستان کې د سولې او ثبات ټینګښت او د دوامدارې پراختیا ملاتړ دی. په سند کې د افغانستان په اړه د سازمان د غړو د ګډ کار د دوام ژمنه شوې، خو د دې همکاریو د عملي کېدو لپاره نور جزئیات نه دي ورکړل شوي.
د ترکژبو هېوادونو سازمان غړو د ټرانسافغان رېلپټلۍ پروژه هم د سیمې د مهمو نښلوونکو او ترانزیټي پروژو له ډلې بللې ده. په اعلامیه کې راغلي چې دا پروژه د سیمهییز اتصال او سوداګرۍ د پیاوړتیا له پلوه ستراتیژیک اهمیت لري.
په ګډه اعلامیه کې د غړو هېوادونو ترمنځ د اقتصادي، سوداګریزو، ترانزیټي او امنیتي همکاریو د پراختیا پر اړتیا هم ټینګار شوی دی. ګډونوالو د سیمهییزې سولې او ثبات د پیاوړتیا لپاره د سیاسي همغږۍ پر زیاتېدو ټینګار کړی دی.