د افغان کډوالو د احتمالي انتقال په اړه د سنجول شوي چلند غوښتنه
د افغانستان د بهرنیو چارو وزارت د هغو راپورونو په غبرګون کې، چې ګواکې امریکا غواړي یو شمېر افغان کډوال پاکستان یا کوم درېیم هېواد ته ولېږدوي، له ټولو اړخونو د مسوولانه او سنجول شوي چلند غوښتنه کړې ده.
د وزارت ویاند عبدالقهار بلخي په یوه خپره شوې خبرپاڼه کې ویلي، د افغان کډوالو د برخلیک په اړه هر اقدام باید د هغوی د قانوني حقونو، انساني کرامت او منل شویو اصولو پر بنسټ ترسره شي. نوموړي ټینګار کړی چې له کډوالو سره باید د نژاد یا نورو توپیرونو له مخې تبعیضي چلند ونهشي.
په خبرپاڼه کې له امریکا غوښتل شوي چې د افغان کډوالو په اړه خپلې پرېکړې له روښانه دوهاړخیز تفاهم، اړینې همغږۍ او د اړوندو کسانو د حقونو او مشروع غوښتنو په پام کې نیولو سره عملي کړي. وزارت ټینګار کړی چې د کډوالو د راتلونکي په اړه باید بېړه ونهشي او موضوع د لنډمهالو امتیازاتو یا نورو ملاحظاتو له مخې ونه ارزول شي.
د بهرنیو چارو وزارت ویلي، په دې بهیر کې د انساني کرامت، بنسټیزو حقونو او بشري معیارونو ساتنه اړینه ده. د وزارت په وینا، د افغان کډوالو د برخلیک په اړه هره پرېکړه باید د هغوی د وضعیت او مشروع غوښتنو په پام کې نیولو سره وشي.
وزارت زیاته کړې چې د افغانستان اسلامي امارت د خپلو اتباعو د ملاتړ، د هغوی د حقونو او خوندیتوب د تأمین مسوولیت پر غاړه لري. دغه وزارت وايي، د افغان وګړو د خوندي او داوطلبانه راستنېدا د اسانتیاوو برابرولو په برخه کې هر ډول رغنده همکارۍ ته چمتو دی.