شهباز شریف: له افغانستانه د ناامنۍ ګواښ د خیبر پښتونخوا د بېړني حالت لامل دی
د پاکستان لومړي وزیر شهباز شریف ویلي، له افغانستانه د پاکستان پر ضد د وسلهوالو فعالیتونو دوام د دې لامل شوی چې په خیبر پښتونخوا کې بېړنی حالت او والي واکمني عملي شي. هغه دا څرګندونې په پېښور کې له پوځي او سیاسي چارواکو، قبایلي مشرانو او د دغه ایالت له والي سره په غونډه کې کړې دي.
شریف ادعا کړې چې له افغانستانه وسلهوال د پاکستان ملکي وګړي، پولیس او پوځیان په نښه کوي او د خیبر پښتونخوا په ځینو سیمو کې د شپې له خوا د خلکو پر ژوند واک چلوي او باج اخلي. نوموړي ویلي، د ایالت امنیتي ادارو ته به هر ډول اړین امکانات برابر کړي، خو دا یې نه دي روښانه کړي چې د امنیت د ټینګښت لپاره به کومه مشخصه تګلاره یا پوځي عملیات عملي کېږي.
د طالبانو د حکومت ویاند ذبیحالله مجاهد د پاکستان د لومړي وزیر ادعاوې په کلکه رد کړې دي. مجاهد ویلي، افغانستان په پاکستان کې د ناامنۍ د رامنځته کولو امکانات نه لري او له ستراتیژیک پلوه هم دا کار افغانستان ته ګټه نه رسوي، بلکې زیان یې تر ټولو مخکې د سیمې او افغانستان پر خلکو تمامېږي.
پاکستاني چارواکو تر دې وړاندې هم ادعا کړې چې د تحریک طالبان پاکستان او بلوڅ بېلتونپالو په ګډون ځینې ډلې په افغانستان کې پناه ځایونه لري او له هغه ځایه په پاکستان کې بریدونه ترسره کوي. د طالبانو حکومت دغه تورونه رد کړي او ویلي یې دي چې یادې ډلې د پاکستان کورنۍ ستونزه ده او اسلاماباد باید پخپله یې د حل لپاره اقدام وکړي.
په همدې حال کې د خیبر پښتونخوا والي فیصل کریم کونډي د تحریک انصاف پر مشرۍ پر تېر ایالتي حکومت تور لګولی چې ګواکې له هغو ډلو سره خواخوږي او اسانتیاوې لري چې په دغه ایالت کې وسلهوال فعالیتونه کوي. د تحریک انصاف د حکومت مشر اعلی وزیر سهیل اپریدي، چې اوس بېواکه شوی، مخکې ویلي وو چې په خیبر پښتونخوا کې به پوځي عملیاتو ته اجازه ورنه کړي. د بېړني حالت له اعلان وروسته د هغه په ګډون د تحریک انصاف ګڼ غړي نیول شوي، خو د دغو تورونو په اړه د هغوی ځواب نه دی څرګند شوی.
شهباز شریف د تحریک انصاف نوم وانخیست، خو د دغه ګوند پر حکومت یې د هېواد ضد چلند تور ولګاوه او د بېړني حالت د دوام ملاتړ یې وکړ. والي کونډي هم ویلي چې له ترهګرۍ سره مبارزه یې لومړیتوب دی او د مرکزي حکومت په همکارۍ به خپلې طرحې پلې کړي. نوموړي خبرداری ورکړی چې څوک د خیبر پښتونخوا د پیاوړتیا په پروګرام کې ګډون نه کوي، باید له دې بهیر څخه څنګ ته شي.
د پاکستان لومړي وزیر په دغه غونډه کې اعلان وکړ چې د خیبر پښتونخوا د پرمختیايي چارو لپاره به ۱۶۰ میلیارده پاکستانۍ روپۍ ځانګړې شي او په ایالت کې به اقتصادي پروژې عملي کېږي. شاوخوا دوه اوونۍ مخکې ولسمشر اصف علي زرداري، له شریف سره تر مشورې وروسته، په دغه ایالت کې بېړنی حالت او والي واکمني اعلان کړې وه. اوس د فیصل کریم کونډي په مشرۍ ۱۱ کسیزه ډله د ایالت چارې اداره کوي، خو لا هم معلومه نه ده چې دغه حالت به تر کومې مودې دوام وکړي.