درېیمه ناهيد، ستره کارنامه او اسلامي شريعت!

نجیب الله احمدزی
الاهه دلاورزۍ د طالبانو د مشهور مطبوعاتي مبلغ قاري سعید خوستي د ذلالت او وحشت په رسوا کولو د درېیمې ناهیدې مقام وګاټه.
لومړۍ ناهيد: ناهيد صاعد يوه ۱۹ کلنه افغانه نجلۍ وه،چې کابل کې ېې ښوونځی لوست او د ۱۳۵۹ کال د ثور په نهمه د سلګونه نورو نجونو په ملتیا یې کابل ښار کې د شوروي ځواکونو د یرغل خلاف لاریون وکړ.
ناهيد د رابعه بلخي ښوونځي زده کوونکې وه او د نورو نجونو په ملتیا د شوروي ځواکونو په ډزو شهیده شوه.
دويمه ناهيد: دويمه ناهيد ۱۴ کلنه وه. هغې د ځينو روايتونو په اساس د کابل ښار په زړو مکرویانو او د ځینو نورو په اساس په درېيمو مکرویانو کې په کال ۱۹۹۳ هغه مهال،چې جهادي تنظیمونو تازه کابل کې د واک په سر جګړې پيل کړې وې، د مکرویانو د یوه لوړ پوړ له کړکۍ ځان وغورزاوه او شهیده شوه.
د ناهید د عزت لوټلو لپاره د جمعیت اسلامي ګوند د شورای نظار جنګيالي وو ورغلي وو،خو هغې ځان شهیده کړه او د اسلام او وطن ګټلو د مردارو موجوداتو هوس ځپلي ېې خپلې ناوړه موخې ته په رسیدو ناکامه کړل.
د شهیدې ناهيد مزار اوس هم د کابل په زړو مکرویانو کې موجود دی او په تېرو کلونو کې ېې کورنۍ او عیني شاهدانو رسنيو ته د دې تاریخي جنایت په مورد کې مفصل معلومات وړاندې کړل.
درېیمه ناهيد: دا ناهيد ژوندۍ ده، خو په مرګ حساب او سرنوشت ېې له وحشت او دهشت څخه ډک!
دا ناهيد ۲۴ کلنه ده، پلار ېې د افغانستان د ملي امنیت د با افتخاره ارګان ډګر جنرال پاتې شوی او دلاور تخلص کوي.
د دغه دلاور او متقاعد ډګر جنرال په لور د اسلام او وطن ګټلو د اوسنيو دعوه دارانو(طالبانو) يوه وياند قاري سعید خوستي د شوې دعوی په اساس اول د طالبانو په یوه زندان کې جنسي تېری کړی او بيا ېې جبرآ ځانته په نکاح کړې ده.
ادعا کیږي،چې ناهيد دلاورزۍ د تېر کال په هغو مياشتو کې چې طالبان تازه پر کابل مسلط شوي وو، لومړی تېری کړی او بيا ېې ځانته واده کړې ده.
ناهيد د ډګر جنرال لور وه، په کابل کې ېې ژوند کړی، د طب پوهنځي د دويم کال محصله وه او څېرې نه ښکاري،چې يوه ښايسته او د لوړ ژوند او اجتماعي مقام څښتنه وه.
اوس قاري سعید دعوه کوي،چې د دغې نجلۍ په غوښتنه ېې هغه نکاح کړې وه او بيا ېې د هغې د عقیدوي مشکل د مخې طلاق ورته ورکړی او هیڅ ډول شکنجه ېې نه ده ورته ورکړې.
قاري خوستی دا هم وايي،چې ناهيد که د طالبانو په محکمې باور لري، عارضه دې شي، تر څو تور و سپين معلوم او شریعت ورباندې تطبيق شي.
تاسې او خدای کوم عقل به دا ومني،چې ناهيد به هغسې خصوصياتو سره قاري سعید خوستي نه، هغه هم په ډېر ګومان په بنه د واده غوښتنه وکړي ؟
قاري سعید د حقاني شبکې غړی پاتې شوی، بګرام زندان کې د تروريستي فعاليتونو له کبله زنداني و او ناهيد به د يوې کابلۍ نجلۍ او د ملي امنیت د یوه ډګر جنرال د لور په حیث هغه نه په همدغه قواره او خصوصياتو ېې د واده غوښتنه کوي ؟!
اوس قاري سعید او طالب پلوو ته ښه ټاپه په لاس ورغلې، چې هغه د خپلو مخالفانو او د جنايتونو د متضررینو لپاره د کفر مهر لګول دي.
الاهه،چې اوس هم د سعيد خوستي په نظر بند کې ده او له هغه ځايه ېې په پټه د تر لاسه کړي انټرنټ او موبایل په وسيله نړۍ په دې وحشت خبر کړي، له مخکې ویلي وو چې سعید خوستي پرې د کفر ټاپې د لګولو نیت کړی او دلیل هم دا دی چې هغې د جمهوريت په نظام کې کابل کې استوګنه لرله.
طالبانو باندې دا اول،دويم، درېیم او لسم اتهام نه دی، چې د فحشاء او جنسي تیري په اړه لګول کېږي.
دوی په بلخ کې د څو ښځینه مدني فعالانو او ژورناليستانو په جنسي تیري او وروسته ېې په وژلو هم تورن شوي وو، په کابل کې د پاسپورټ ریاست د رييس ملا حقاني ورور خو مستندې ويډيو سره ولیدل شو،چې په یو هوټل کې نجونې ګډوي، شراب څښي او پيسې ېې د پاسپورټونو له کميشن کارۍ تر لاسه کوي.
د طالبانو د مشرانو څووم ودونه، په دې اړه يې د لوی مشر ملا هبت الله فرمان چې څو ودونه به نه کوئ او نور ډېر موارد هم شته.
البته که رسنۍ زندۍ شوې نه وای، د ټولنیزو رسنیو استعمالونکي په درو وهل شوي نه وای، خبریالان وژل شوي، زنداني شوي او تبعيد شوي نه وای، د هوس او وحشت د حاکمو لېوانو ډېر نور وحشتونه به هم مستند شوي او رسنيز شوي وای.
اوس،چې ناهید دلاورزۍ سر په لاس کې نیولی، ورسره د شوي جنایت مستندې ويډيو ګانې ېې خپرې کړي، طالب مشران ولې د شريعت د تطبيق غږ نه کوي ؟
آيا شریعت وحشيان او خلاف کاران په طالبانو او غیر طالبانو وېشلي او که طالب مشرانو او مفتیانو خپلو جنګياليو ته فتوا ورکړې،چې افغانستان کې په لاس ورغلي هر څه د دوی غنیمت دي، د وسلو او پيسو د ډیپو ګانو په شان دې ښځې هم ځانته وينځې کړي او هر څه ورته روا دي ؟
اوس به طالبانو سره د نړیوالو د چلند اندازه هم معلومه شي،چې افغانستان ته خپل راوستي ارزانه نیابتي لښکر سره د داسې مستندو اسنادو په لیدو څه کوي؟
ولیدل شي،چې زموږ طالب پلوه خلک څه توجيه لټوي، د پردي او خپل عزت لوټل کیدو ته څومره په تفاوت قایل دي او وجدان ېې د طالب د ملاتړ او که مخالفت فيصله کوي ؟
ټولو نه مهمه موضوع د ناهید دلاورزۍ برخلیک دی،چې د داسې سترې تاريخي کارنامې او افشاګرۍ نه وروسته نړیوال بشري حقونه، زموږ ملي او اسلامي ارزښتونه او د اسلامي او شرعي نظام د قایمولو مدعيان څه ورسره کوي؟!
آخره کې یاد ولرئ،چې الله تعالی عادل ذات دی، څنګه چې د افغانستان د پخوانيو جهادي تنظیمونو د مشرانو کورنۍ د نورو په کافر ګڼلو وشرمیدل، همداسې به د طالبانو مشران او لابي ګران د يوه مسلمان ملت په کافر ګڼلو او د وژلو په فتواوو يو بل پسې شرميږي.