مازديګر

طلايي فرش يې خور كړى غوړېدلى لروبر دى
له چنار څخه را تاو دى ناست په څنډو د ګودر دى

د پامير په غېږ كې ښوري د سپين غر ټټر پرې ښكلى
د ګوربت په اوږو ناڅي غرق د مينې په غومبر دى

په بلبل يې جادو كړى  مست رباب ته دى د څانګو
له سندرو يې خور شوى يو څپانده خوږ شرر دى

خړه زركه بدل بولي د سندرو په محل كې
مچوي د نسيم  كرښې غوړولى يي وزر دى

برګ دسمال يې دى په غاړه كړي چكچكې په سرو شونډو
سره لالونه په ګډا دي د ملي اتڼ لمبر دى

د شمال څپه پرې راشي بار د عطرو ځنې واخلي
د فضا مخ يې وينځلى شين آسمان پرې بختور دى

دا كمال د لمر د وړانګو بيا راوړى پسرلي دى
احمدي ګوره په بڼ كې د ښكلاوو مازديګر دى

يكشنبه: ۱۰/۶/ ۱۳۸۱ هـ. ل .