سباوون

لمر چې غېږ كې نړۍ ونيسي سهار شي
طلايي فرش پرې د وړانګو راهوار شي

نوى يون شي د ګلزار په پګړۍ پورې
د بلبلو د سندرو شرنګهار شي

ښكلې وړانګې ځي د پرخې تر څنګ كښيني
په عطري جامه كې غېږ په غېږ دلدار شي

يو بدن او يوه نغمه شي دواړه درومي
ګل يې لاس تر لاس نيولى د بڼ هار شي

نوې هيلې د مستۍ جامونه نوش كړي
ور روانې د ښكلا په لاله زار شي

نوې ورځ، نوې دنيا، نوى موسم شي
نوې سيمه، نوې ځمكه، نوى ښار شي

د تورتم په سينه سپنې وړانګې پورته
"احمدي" سباوون ستا د مينې يار شي