د چا د شونډو تصور د خیال له طوره ښکاري
 هره غوټۍ د پسرلي نن راته حوره ښکاري
 
 ښکلا که نه وای تصور د بدرنګۍ به نه ؤ
 دا غرونه غرونه سیوري ټول د چا له نوره ښکاري
 
 په خیال مین یم د خیال رنګ و نور زما هستي ده
 څومره ساده ده په یوه جلوه مغروره ښکاري
 
 قاتل مې ګوره اوس د اوښکو کرښې نشي لیدی
 د یار په ګل ګل اننګو کې ورته توره ښکاري
 
 د نرګسي سترګو افسون دې او که څه کیسه ده
 هره ښکلا نن د فطرت راته رنځوره ښکاري
 
 د " کسي اور" دی د مغرب د څراغونو نه ده
 دغه رڼا چې اوس زما د لا شعوره ښکاري
 
 چې په ړندو حواسو ګوري د ښایست رنګونه
 د نړۍ هره فلسفه راته معذوره ښکاري
 
 لمر مخې ستا په مخ کې دومره رنګیني خو نه وه
 دا ټول رنګونه مې د خپل زړه له منشوره ښکاري