نظر د مينې مې د حسن سيپارې تخنوي
لكه سحر نسيم د ګل شونډې پستې تخنوي

زړه را نه غواړي د پستو څڼو وږمې ملګرو
بيا مې د اوښكو په رڼو ګوتو ليمې تخنوي

ستا د يادونو سوداګر زما د تن كلي كې
اوس ښه بلد شو د زړه پټې دروازې تخنوي

كه مې په ژبه وكرلې دا څه شرم نه دى
زېړوكى لمر هر مازديګر كې ګلدرې تخنوي

كله مسكى شي كله غونډې جلوه ګرې پيڅې
دا شوخكى نظر د چا دى؟ ايينې تخنوي

دا چې مې سترګو كې راشين شو د سكروټو ګل فرش
د خوب لمن راته جلانه شوګيرې تخنوي