یه انځور ګره وایه دا انځور به څنګه کاږې
زه چې په کومه ورځ
له کوره چېرې ووځمه
مور مې اوبه راپسې وشیندي
او وژاړي لږ
لاس په دعا وي دروازه کې
تر هغې ولاړه
چې یې له سترګو ښه پناه شمه
دکلي په کوڅو کې ورک شم
او انځورګره
وایه دا تصویر به چېرې مومم
ډېره موده پس چې د خپل کور
دروازې ته ورشم
خور مې له ډېرې خوښۍ چیغه کړي
او منډې وهي
له خندا شنه وي
تکه شنه وي راترغاړې وځي
د مور په سترګو کې مې
داسې خوښي وځلېږي
چې یې ښکلا ته شي تر ډېره
زما ژبه بنده
نو انځورګره وایه دا خوښي به چېرې مومم
چې هره ورځ یې خپلې خور
او خپلې مور ته یوسم!!