یونیسف: په افغانستان کې ۱۲.۷ میلیونه ماشومانو ته د پولیو واکسین ورکړل شوی
د ملګرو ملتونو د ماشومانو د ملاتړ ادارې یا یونیسف وايي، په افغانستان کې ۱۲ میلیونه او ۷۰۰ زره ماشومان د پولیو یا ګوزڼ پر وړاندې واکسین شوي دي.
یونیسف دا معلومات نن په خپله اېکس پاڼه کې خپاره کړي او ویلي یې دي چې دغه واکسینونه د واکسیناتورانو د هڅو په پایله کې ماشومانو ته ورکړل شوي دي.
دې ادارې د واکسیناتورانو د فعالیتونو یوه ویډیو هم له خپل پیغام سره یوځای خپره کړې ده. په ویډیو کې د پولیو ضد واکسین د تطبیق بهیر ښودل شوی، خو د کمپاین د دقیقې مودې او جغرافیایي پوښښ په اړه نور معلومات نه دي ورکړل شوي.
پولیو یوه ساري ناروغي ده چې ماشومان اغېزمنوي. د یونیسف د تازه څرګندونو له مخې، په افغانستان کې د دې ناروغۍ پر وړاندې د ماشومانو د واکسینولو لړۍ د واکسیناتورانو له لارې روانه ده.