پنځه اروپايي هېوادونه رد شوي پناه غوښتونکي روانډا ته لېږي

جرمني، اتریش، یونان، ډنمارک او هالنډ پلان لري هغه پناه غوښتونکي روانډا ته ولېږي چې په اروپايي ټولنه کې یې د پناه غوښتنې غوښتنلیکونه رد شوي دي. ټاکل شوې چې د دې طرحې جزئیات د دوشنبې په ورځ په ویانا کې اعلان شي.
د پلان له مخې، یاد کسان به په روانډا کې د کډوالو د بېرته ایستلو په یوه مرکز کې ځای پر ځای شي. دا طرحه یوازې هغه پناه غوښتونکي رانغاړي چې په اروپايي ټولنه کې د پاتې کېدو ټولې قانوني لارې یې کارولې وي، خو غوښتنلیکونه یې په پای کې رد شوي وي.
د اروپايي هېوادونو دا اقدام د اروپايي ټولنې د هغو نویو مقرراتو له تصویب وروسته مطرح کېږي چې د رد شویو پناه غوښتونکو د بېرته ستنولو بهیر چټکوي. د دغو مقرراتو له مخې، د ټولنې غړي هېوادونه کولای شي له اروپايي خاورې بهر د بېرته ستنولو مرکزونه جوړ کړي.
د طرحې ملاتړي حکومتونه وايي، هدف یې د ناقانونه کډوالۍ کمول او د هغو کسانو مخنیوی دی چې په ناقانونه لارو اروپا ته سفر کوي. روانډا هم ځان د هغو کډوالو د منلو لپاره چمتو ښودلی چې لویدیځ هېوادونه یې د بېرته ایستلو پرېکړه کوي.
خو د بشري حقونو بنسټونو د دې طرحې په اړه اندېښنه څرګنده کړې ده. دوی خبرداری ورکړی چې ښايي د پناه غوښتونکو حقونه تر پښو لاندې شي او د احتمالي سرغړونو د څېړلو او حساب ورکولو لپاره روښانه میکانیزم موجود نه وي.
روانډا، چې د بشري حقونو د وضعیت او د سیاسي آزادیو د محدودیتونو له امله له نیوکو سره مخ ده، د دې طرحې د عملي کېدو احتمالي هېواد بلل کېږي. د پنځو اروپايي هېوادونو حکومتونه به په ویانا کې د پلان په اړه نور معلومات وړاندې کړي.