روبیو: واشنګټن د افغانستان له خاورې د پاکستان د امنیتي اندېښنو په اړه همکاري کولی شي

د امریکا بهرنیو چارو وزیر مارکو روبیو وايي، هېواد یې چمتو دی چې د افغانستان له خاورې سره تړلو د پاکستان د امنیتي اندېښنو د کمولو لپاره اغېزمن رول ولوبوي.

روبیو دا څرګندونې د شنبې په ورځ د امریکا په اټلانټا ښار کې یوې خبري غونډې ته کړې دي. هغه وویل، پاکستان باور لري چې اسلامي امارت د هغو بریدونو د مخنیوي لپاره کافي اقدامات نه دي کړي چې د افغانستان له خاورې سره تړاو ورکول کېږي.

د امریکا د بهرنیو چارو وزیر وویل، واشنګټن نه غواړي پاکستان د ترهګریزو بریدونو هدف وګرځي. نوموړي زیاته کړه، که د دې وضعیت د حل لپاره د امریکا هر ډول اغېزمنه ونډه اړینه وي، هېواد به یې ترسره کولو ته چمتو وي.

روبیو په خپلو خبرو کې وویل چې امریکا له اسلامي امارت سره نږدې اړیکې نه لري. هغه ټینګار وکړ چې واشنګټن د ترهګرۍ مخالف دی، پرته له دې چې دا ډول فعالیتونه له کوم ځایه سرچینه اخلي او څوک یې هدف وي.

پاکستان تر دې وړاندې څو ځله اسلامي امارت تورن کړی چې د تحریک طالبان پاکستان غړو ته اجازه ورکوي څو د افغانستان له خاورې په پاکستان کې بریدونه وکړي. دغه ادعاوې د افغانستان د سرپرست حکومت له لوري رد شوې دي.

اسلامي امارت ټینګار کوي چې د افغانستان خاوره به د نورو هېوادونو پر ضد نه کارول کېږي. د روبیو وروستۍ څرګندونې په داسې حال کې کېږي چې د افغانستان او پاکستان ترمنځ د امنیتي اندېښنو په اړه د دواړو لورو دریځونه لا هم سره توپیر لري.