انګور اډه کې د ډزو له کبله کابل او اسلاماباد یو بل ملامتوي
د افغانستان او پاکستان پر پوله د پکتیکا ولایت د انګور اډې په سیمه کې د دواړو لورو ترمنځ د درنو او سپکو وسلو ډزې شوې دي. کابل او اسلاماباد د پېښې د پیل په اړه بېلابېلې ادعاوې لري او یو بل د بریدونو په پيلولو تورنوي.
د پاکستان حکومت ویلي، ځواکونو یې هغه مهال ځوابي ډزې وکړې چې د دوی په ادعا، له افغان لوري پرې بېدلیله ډزې وشوې. پاکستاني رسنیو د دغه هېواد د امنیتي سرچینو په حواله راپور ورکړی چې په دې ډزو کې لږ تر لږه یو ملکي وګړی وژل شوی او پنځه نور ټپیان شوي دي.
د جنوبي وزیرستان مرستیال کمېشنر هم ادعا کړې چې افغان ځواکونو د سېشنبې په شپه د ملکي وګړو پر کورونو ډزې کړې دي. د هغه په وینا، د هاوان د مرمۍ په لګېدو یو کس وژل شوی، پنځه نور ټپیان شوي او یو شمېر دوکانونه زیانمن شوي دي. نوموړي ویلي چې پاکستاني ځواکونو په ځواب کې ډزې کړې او د کرښې په اوږدو کې یې درنو بریدونو ته دوام ورکړی دی.
د طالبانو دفاع وزارت بیا ویلي چې پاکستاني پوځیانو د پکتیکا د انګور اډې بازار او کمیسارۍ ته بېپیلوټه الوتکې استولې او د کمیسارۍ او نږدې امنیتي تاسیساتو پر ضد یې څلور بریدونه کړي دي. وزارت دا بریدونه بېدلیله بللي، خو د ادعا شوو بریدونو د زیانونو په اړه یې بشپړ معلومات نه دي ورکړي.
د طالبانو د دفاع وزارت په وینا، افغان امنیتي او دفاعي ځواکونو د دغو بریدونو په ځواب کې د پاکستاني ځواکونو پر یوې قرارګاه او پوستو بریدونه کړي دي. دغه وزارت ادعا کوي چې په پایله کې یې یو شمېر پاکستاني عسکر وژل شوي یا ټپیان شوي او پوځي تاسیساتو ته درانه زیانونه اوښتي دي. د دغو ادعاوو خپلواکه تایید نه دی شوی.
دغه نښته د ډیورند کرښې هغې برخې ته نږدې شوې چې د پاکستان د خیبر پښتونخوا د جنوبي وزیرستان له قبایلي سیمې سره ګډه پوله لري. د افغانستان پکتیا او پکتیکا دواړه له دې سیمې سره سرحد لري. پاکستان ابزرور ورځپاڼې راپور ورکړی چې پاکستاني پوځیان په خپلو پوستو کې د تیارسۍ په حالت کې دي.
د دواړو هېوادونو اړیکې په وروستیو کلونو کې، په ځانګړي ډول د تېر کال له اکتوبر وروسته، د پاکستان دننه د وسلهوالو بریدونو له زیاتېدو سره لا ترینګلې شوې دي. اسلاماباد افغانستان او هند د تحریک طالبان پاکستان او نورو وسلهوالو ډلو په ملاتړ تورنوي، خو کابل او نوي ډیلي دا ادعاوې ردوي. د طالبانو ویاند ذبیحالله مجاهد هم پاکستان تورن کړی چې د خپلو امنیتي ستونزو د پټولو لپاره پر افغانستان نیوکې کوي.