امریکا د افغانستان کې د طالبانو د مخالفو ډلو د ملاتړ راپورونه څاري
د امریکا د متحدو ایالتونو د بهرنیو چارو وزارت وايي، واشنګټن په افغانستان کې د طالبانو پر ضد د جګړې کوونکو وسله والو ډلو د پاکستان د ملاتړ په اړه له خپرو شویو راپورونو خبر دی او وضعیت له نږدې څاري.
د دغه وزارت یوه ویاند د چهارشنبې په ورځ د امریکا غږ د افغانستان څانګې د پوښتنې په ځواب کې ویلي، متحده ایالتونه د یادو راپورونو په اړه معلومات لري، خو د موضوع په تړاو یې نور جزئیات نه دي وړاندې کړي.
د امریکا د بهرنیو چارو وزارت یو ځل بیا څرګنده کړې چې متحده ایالتونو نه طالبان او نه هم کومه بله ډله د افغانستان د حکومت په توګه په رسمیت پېژندلې ده. د وزارت ویاند ټینګار کړی چې د واشنګټن رسمي دریځ په دې برخه کې نه دی بدل شوی.
د سرچینې د معلوماتو له مخې، د پاکستان او د طالبانو د حکومت اړیکې په وروستیو کلونو کې ترینګلې شوې دي. اسلاماباد پر طالبانو تور لګوي چې د تحریک طالبان پاکستان، چې په ټيټيپي مشهور دی، په ګډون یې د پاکستان مخالفو ډلو ته په افغانستان کې پناه ورکړې ده.
پاکستان سږ کال د کابل په ګډون د افغانستان په یو شمېر ولایتونو کې هوايي بریدونه کړي او د ډیورند کرښې په اوږدو کې د دواړو غاړو ترمنځ نښتې هم شوې دي. طالبانو بیا اسلاماباد تورن کړی چې په افغانستان کې د دوی د وسله والو مخالفانو ملاتړ کوي یا ورته د فعالیت زمینه برابروي.
د طالبانو حکومت د سپټمبر میاشتې په وروستیو کې د نورستان ولایت د کامدېش ولسوالۍ نښتو ته په اشاره ادعا کړې وه چې وسله وال مخالفان په پاکستان کې روزل شوي او افغانستان ته لېږدول شوي دي. دا ادعاوې د پاکستان د اطلاعاتو وزارت رد کړې او بېبنسټه، بېاساسه او له حقیقته لرې یې بللې دي.
د پاکستان د اطلاعاتو وزارت همداراز د دغه هېواد د امنیتي ځواکونو او استخباراتي چارواکو له لوري د یادو ډلو د روزنې او سمبالولو ادعا رد کړې ده. د امریکا د بهرنیو چارو وزارت تر اوسه په دې اړه د ادعاوو د کرهوالي په اړه پرېکنده دریځ نه دی اعلان کړی، خو وايي چې موضوع له نږدې څاري.