افغانستان د یو ورځنیو کرېکټ لوبډلو په درجهبندۍ کې اووم شو
افغانستان د کرېکټ نړیوالې شورا (ICC) په تازه یو ورځنۍ درجهبندۍ کې له انګلنډ څخه مخکې شوی او د لوبډلو په جدول کې یې اووم ځای نیولی دی. افغان لوبډلې په دې بڼه کې د وروستیو بریاوو له امله خپل دریځ پیاوړی کړی دی.
په نوې درجهبندۍ کې افغانستان ۹۴ نمرې لري، په داسې حال کې چې انګلنډ ۹۳ او سریلانکا ۹۵ نمرې لري. هند د ۱۱۵ نمرو په لرلو سره د جدول په سر کې دی او نیوزیلنډ د ۱۰۹ نمرو په لرلو دویم ځای لري.
افغانستان خپلې وروستۍ اووه نړیوالې یو ورځنۍ لوبې ګټلې دي. په دغو بریاوو کې د بنګلهدېش او زېمبابوې پر وړاندې د وروستۍ درېهېوادیزې لوبلړۍ ټولې سیالۍ هم شاملې دي، چې افغان لوبډلې پکې له ماتې پرته پای ته ورسېده.
انګلنډ بیا په پاکستان کې د روانې درېهېوادیزې لوبلړۍ په دواړو لومړنیو سیالیو کې د پاکستان او سریلانکا پر وړاندې ماتې خوړلې ده. انګلنډ ونه توانېد چې د سریلانکا پر وړاندې د ۴۳۰ منډو هدف وساتي. افغانستان په نوې درجهبندۍ کې له انګلنډ سربېره د ویسټ انډیز، بنګلهدېش، زېمبابوې او ایرلنډ په څېر له یو شمېر بشپړ غړیتوب لرونکو لوبډلو هم مخکې دی.
د ICC د شلاووریزو لوبو په درجهبندۍ کې افغانستان پر خپل مخکیني لسم ځای پاتې دی. په دې برخه کې انګلنډ لومړی او هند دویم ځای لري. د لوبډلو درجهبندي د ترلاسه شویو نمرو د ترسره شویو سیالیو یا لوبلړیو پر شمېر د وېشلو او د نږدې بشپړ عدد په ټاکلو محاسبه کېږي؛ دا تګلاره د بریتانیا کرېکټ احصایهپوه ډېوېډ ګېنډېکس جوړه کړې ده.