پاکستاني وزیر: سهیل افریدي د مذاکراتي مسودې لپاره له افغانستانه د اجازې غوښتنه کړې

د پاکستان د پارلماني چارو فدرالي وزیر طارق فضل چودري ادعا کړې چې د خیبر پښتونخوا پخواني اعلی وزیر سهیل افریدي د اسلاماباد او تحریک انصاف ترمنځ د مذاکراتو د یوه مسودې د تایید لپاره له افغانستانه د اجازې غوښتنه کړې وه.
چودري دا څرګندونې له جیو نیوز سره په خبرو کې کړې دي. هغه ویلي، د پاکستان د لومړي وزیر په لارښوونه له تحریک انصاف سره خبرې پیل شوې وې او حکومت تمه لرله چې دغه بهیر به یوې پایلې ته ورسېږي.
د نوموړي په وینا، د مذاکراتو په لړ کې څلورمه مسوده چمتو شوې وه او د هغې د تایید لپاره د خیبر پښتونخوا د اعلی وزیر موافقې ته اړتیا وه. خو چودري ادعا کوي چې سهیل افریدي د مسودې له تایید مخکې له افغانستانه د اجازې غوښتنه کړې وه.
پاکستاني وزیر د خبرو له بهیر سره د محمود اڅکزي د دریځ یادونه هم کړې ده. د چودري په وینا، اڅکزي ویلي وو چې له عمران خان سره تر لیدنې مخکې مذاکرات د پام وړ پرمختګ نه شي کولای.
چودري زیاته کړې چې په مذاکراتو کې له عمران خان سره د لیدنې لپاره د وخت چوکاټ او د هواري یوه مشخصه طرحه موجوده وه. د ده په باور، که په هغه وخت کې ستونزې هوارې شوې وای، ښايي د پاکستان اوسنی سیاسي وضعیت له اوسني حالت سره توپیر درلود.
نوموړي همداراز ویلي، که تحریک انصاف د پاکستان له اسمبلۍ څخه د خپلو غړیو د استعفا پرېکړه عملي کړي، شاوخوا ۴۰ غړي به یې له استعفا ورکولو ډډه وکړي. تر اوسه تحریک انصاف د چودري د څرګندونو په اړه رسمي غبرګون نه دی ښودلی.