عیسی بهرام

ستا یادونو سره شپه کوم پوهېږم
‎له غمونو لږ دمه کوم پوهېږم
‎‌‌‌‌‌‌ډېر زخمونه یې په زړه راته راجوړ دي
‎له اسمان به څه ګیله کوم پو هېږم
‎د ترخو ترخو حالاتو برمته یم
‎خو خبره مې خوږه کوم پوهېږم
‎زه دژوند په مفهوم پوه یم سر تر پایه
‎زه دځان سره دوکه کوم پوهېږم
‎دغریب بهرام غزل غزل جانانه
‎له زړه مینه درسره کوم پوهېږم

چې زړه دې تنګ وي، او ته هیڅ نه وایې
په کور دې جنګ وي ، اوته هیڅ نه وایې
د خوشحال خان د غولي واکدار
زوی د اورنګ وي ، او ته هیڅ نه وایې
سوچ نهیلۍ دژوند کې ډوب وي
دستار ترنګ وي ، او ته هیڅ نه وایې
اند دې ګیر کړی وي چوپتیا په دام کې
څښلي دې بنګ وي ، او ته هیڅ نه وایې
دوکه فریب د وخت سیاست
نګه نیرنګ وي ، اوته هیڅ نه وايې
ظلمت دنور مرۍ پریکوي
د خطر زنګ وي ، او ته هیڅ نه وایې
د ځان ځانۍ په رنګ بهرامه
هر سړی رنګ وي ، او ته هیڅ نه وایې