افغانستان ته د هانګ کانګ سکسز په نیمه پایلوبه کې د ۱۱۶ منډو هدف وټاکل شو
اسټرالیا د افغانستان پر وړاندې د هانګ کانګ سکسز سیالیو په نیمه پایلوبه کې لومړی توپ وواهه او په شپږو اورونو کې یې د پنځو وېکټو په له لاسه ورکولو ۱۱۵ منډې جوړې کړې. له دې سره افغانستان ته د بریا لپاره د ۱۱۶ منډو هدف ورکړل شو.
د اسټرالیا په توپ وهنه کې مکس براینټ تر ټولو زیاتې، ۴۴ منډې وکړې. جیک ووډ پنځه، نیک هابسن اته، الیکس راس ۱۰ او کریس ګرین یوه منډه ترلاسه کړه. د اسټرالیا د لوبډلې په ترکیب کې پیټریک ډولي هم شامل و.
افغانستان په دې سیالیو کې د ګلبدین نایب، کریم جنت، فرمان الله، صدیق الله پاچا، عمران میر او ننګیالي خان په ګډون لوبغاړي لري. د اسټرالیا لپاره بیا جیک ووډ، مکس براینټ، نیک هابسن، الیکس راس، کریس ګرین او پیټریک ډولي لوبېږي.
اسټرالیا تر نیمه پایلوبې مخکې په ګروپي پړاو کې له انګلستان او کوربه هانګ کانګ سره لوبې ګټلې وې. دغه لوبډلې په نیمه پایلوبه کې متحده عربي اماراتو ته هم د ۵۳ منډو په توپیر ماتې ورکړې وه.
د روان کال هانګ کانګ سکسز سیالیو کې ۱۲ لوبډلو ګډون کړی و. هند، اسټرالیا، انګلستان، پاکستان او سویلي افریقا هم د ګډون کوونکو لوبډلو په ډله کې دي او ټیمونه په څلورو ګروپونو کې سره سیالي کوي.
هانګ کانګ سکسز د کرېکټ لنډ او چټک ډول دی چې هره لوبډله پکې شپږ لوبغاړي لري او د هرې لوبې لپاره شپږ اورونه ورکول کېږي. په دې بڼه کې د لوبې له پیل سره سم برید کوونکې توپ وهنه کېږي، نو لوبډلې ډېری وخت په لږو اورونو کې له ۱۰۰ څخه زیاتې منډې جوړوي.
په دې فارمیټ کې ځینې ځانګړي قوانین هم شته؛ د بېلګې په توګه، هغه توپ وهونکی چې ۵۰ منډې بشپړې کړي، باید له لوبې ووځي، او له وېکټ ساتونکي پرته هر لوبغاړی باید لږ تر لږه یو اوور ترسره کړي. دا سیالۍ په ۱۹۹۲ کال کې پیل شوې وې او له څو کلنې وقفې وروسته په ۲۰۲۴ کال کې بېرته ترسره شوې.