اروپايي ټولنه: له افغانستان سره مرستې او د حقونو ملاتړ به دوام ولري
اروپايي ټولنې د ملګرو ملتونو د عمومي اسمبلۍ د درېیمې کمېټې په غونډه کې له افغانانو سره د روان ملاتړ پر دوام ټینګار کړی دی. دې ټولنې د بشري مرستو ترڅنګ په افغانستان کې د ملګرو ملتونو د مرستندویه پلاوي، یوناما، د ماموریت د دوام غوښتنه هم کړې ده.
د اروپايي ټولنې په وینا، له افغانستان سره د بشري مرستو بهیر له ۱۹۹۴ کال راهیسې روان دی او په دې موده کې یې شاوخوا دوه میلیارده یورو مرسته کړې ده. د معلوماتو له مخې، د دغو مرستو له ډلې ۳۲۰ میلیونه یورو د ۲۰۲۴ او ۲۰۲۵ کلونو لپاره ځانګړې شوې دي.
اروپايي ټولنې په خپله وینا کې د بشري حقونو د سرغړونو په تړاو د حساب ورکونې د هڅو پر دوام هم ټینګار کړی دی. خو په غونډه کې د یادو سرغړونو مشخص موارد نه دي بیان شوي.
د دې ټولنې په پای کې د ښځو او ځوانانو د حقونو د ساتنې لپاره د نړیوالو لارو چارو غوښتنه شوې ده. اروپايي ټولنه وايي، ښځې او ځوانان باید د افغانستان د راتلونکي برخلیک په ټاکلو کې د ګډون فرصت ولري.
دا څرګندونې په داسې حال کې کېږي چې د افغانستان اسلامي امارت تر دې وړاندې ویلي، په هېواد کې د بشري حقونو تامین د تېر په پرتله اوس د شریعت په چوکاټ کې ښه شوی دی.
اروپايي ټولنې په ملګرو ملتونو کې د خپلو څرګندونو له لارې څرګنده کړې چې له افغانانو سره بشري ملاتړ، د یوناما د رول دوام او د حقونو اړوند موضوعاتو ته پاملرنه لا هم د نړیوالې اجنډا برخه ده.